«Մեզ մոտ անչափահասներ չեն խաղում. Ալեն Սիմոնյանը ստում է». Գուդվին-ԲԵՏ»-ի աշխատակից

Մեզ մոտ մինչեւ անձը հաստատող փաստաթուղթ ցույց չեն տալիս, որ ինքն իրավունք ունի խաղալու, մեր գրասենյակներում ոչ մեկ խաղադրույքներ չի վերցնում: Այս մասին այսօր՝ մայիսի 29-ին, լրագրողների հետ զրույցում ասաց «Գուդվին-ԲԵՏ» ընկերության աշխատակիցը:

«Ալեն Սիմոնյանը ստում է, մեզ մոտ անչափահասներ չեն խաղում, քանի որ «Գուդվին-ԲԵՏ»-ում վերահսկողությունը բարձր մակարդակի է: Իսկ իր ընդունած օրենքով, երեխան իր հայաթից ինչ-որ մեկին 18 տարեկանը լրացած, կխնդրի, կասի՝ կթողես քո պասպորտով գրանցվեմ: Էն էլ թույլ ա տալու, արդյունքում՝ գրանցվում ա անչափահասը չափահասի պասպորտով, սկսում ա խաղալ»,- ասաց աշխատակիցը եւ նշեց, որ համաձայն չի ՀՀ ԱԺ փոխնախագահ Ալեն Սիմոնյանի այն խոսքին, թե խաղամոլությունն այդ տարբերակով վերանալու է:

Նշենք, որ այսօր՝ մայիսի 29-ին, առավոտից բուքմեյքերական ընկերությունների աշխատակիցները Հայաստանի ԱԺ դիմաց բողոքի ակցիա էին իրականացնում ընդդեմ բուքմեյքերական գրասենյակների գործունեությունը սահմանափակով օրինագծի, որը հավանության է արժանացել ԱԺ տնտեսական հանձնաժողովի կողմից եւ ուղարկվել ԱԺ քննարկմանը: Ցուցարարները փակել էին Բաղրամյան պողոտան եւ պահանջում էին հանդիպում ԱԺ նախագահ Արարատ Միրզոյանի հետ: Մի քանի ժամ տեւած ակցիայից հետո, ՀՀ ոստիկանապետ Վալերի Օսիպյանի միջամտությամբ, ընկերության աշխատակիցներից կազմվեց 5 հոգանոց խումբ, եւ հանդիպում եղավ ՀՀ տնտեսական հանձնաժողովի նախագահ Բաբկեն Թունյանի հետ:

Հիշեցնենք, որ ԱԺ տնտեսական հանձնաժողովը հավանության է արժանացրել վիճակախաղերի կազմակերպման պայմանները խստացնելու մասին նախագծին, որը մշակվել է խաղամոլության դեմ պայքարի շրջանակում։ Նախագծով առաջարկվում է Երեւան քաղաքից հեռացնել բոլոր բուքմեյքերական գրասենյակները։ Նախագիծն ընդունելու պարագայում այն ուժի մեջ կմտնի 2020 թ․-ի նոյեմբերից:

Նախագծի համահեղինակներն են պատգամավոր Նաիրա Զոհրաբյանը («Բարգավաճ Հայաստան» խմբակցություն), ԱԺ փոխխոսնակ Ալեն Սիմոնյանը եւ պատգամավոր Սիփան Փաշինյանը («Իմ քայլը խմբակցություն»): Հեղինակների կարծիքով` օրինագծում փոփոխությունների ընդունումը կարեւոր քայլ է խաղամոլության դեմ պայքարի գործում: