Որքանով են երեւանցիները ուշադիր քաղաքի մաքրությանը. փորձարկում՝ Հյուսիսային պողոտայում

Համապետական շաբաթօրյակին ընդառաջ՝ Երեւանի քաղաքապետարանը փորձել է պարզել, թե որքանով են բնակիչներն ուշադիր քաղաքի մաքրությանը:

Այս առնչությամբ ԵՐեւանի քաղաքապետի մամուլի խոսնակ Հակոբ Կարապետյանը Facebook-ի իր էջում, մասնավորապես, գրել է. ««Մեր տեղեկատվության վարչության աշխատակիցները սոցիալական էքսպերիմենտի նման բան են արել՝ Հյուսիսայինում աղբաման են դրել ու երկու ժամ նկարել՝ ֆիքսելու, թե կողքը ընկած աղբը քանի հոգի են նկատում: Արդյունքում՝ էնքան շատ մարդ աղբարկղի մոտ ընկած տոպրակը նկատեց, վերցրեց ու գցեց աղբարկղը, որ բոլորին չկարողացանք «տեղավորել» հոլովակի մեջ:

Սա ինձ համար շատ կարեւոր ա ու հատկանշական: Մենք տարիներ շարունակ լսել ենք, որ «էս երկիրը երկիր չի դառնա, քանի դեռ մարդիկ զիբիլը/բիչոկը/մառոժնու թուղթը գետնին են գցում»: Թույլ տվեք պնդել, որ մեզ տարիներ շարունակ ՀԱՎԱՏԱՑՐԵ՛Լ ԵՆ, որ փողոցում եղած աղբի պատճառը ոչ թե վատ կառավարումն է, ծույլ ու անհավես կոմունալշիկները, այլ փնթիության հանդեպ համընդհանուր «գենետիկ» հակվածությունը: Նույն կերպ մեզ տարիներ շարունակ համոզել են, որ կոռուպցիան ոչ թե վերեւից սահմանած խաղի կանոն ա, այլ «հայի խասյաթի» անբաժանելի մասը՝ արյան գույնը, որ «10 000 դրամանոց» ընտրությունները ոչ թե կիսակրիմինալ իշխանավորների ստեղծած պահանջարկն ու պարտադրանքն են, այլ «հասարակ ժողովրդի» երազած կենսաձեւը:

Ու հիմա տեսնում ենք, որ էդպես չի՝ մարդիկ առանց ինչ-որ ինտենսիվ սոցիալական արշավների, առանց «Ինչպես մաքուր պահել քաղաքը» թեմայով թրեյնինգների, կռանում ու վերցնում են գետնին թափված աղբը: Ու էդպես՝ բոլոր բնագավառներում:

Ու քաղաքի, երկրի կառավարումը ստանձնած մարդիկ ելնում են էն կանխավարկածից, որ գործ ունեն գիտակից, գրագետ ու պահանջատեր քաղաքացու հետ»:

Հյուսիսային պողոտայում սոցիալական էքսպերիմենտի արդյունքները դիտեք տեսանյութում: