Անգլիական ֆուտբոլային ակումբի սեփականատերը զոհվել է ուղղաթիռի պայթյունի հետևանքով (տեսանյութ)

«Լեսթեր Սիթին» պաշտոնական հայտարարությամբ է հանդես եկել ակումբի սեփականատեր Վիչայ Շրիվադդհանապրաբհայի ուղղաթիռի պայթյունի վերաբերյալ, որը տեղի է ունեցել հոկտեմբերի 27-ին «Քինգ Փաուեր» ստադիոնի մոտակայքում:

 Միջադեպը տեղի է ունեցել անգլիական Պրեմիեր-լիգայի 10-րդ տուրի` «Լեսթեր Սիթիի» և «Վեսթ Հեմ Յունայթեդի» միջև կայացած խաղից հետո (1:1):

 Ակումբի սեփականատիրոջ ուղղաթիռն օդ է բարձրացել, սակայն շուտով կորցրել կառավարումն ու ընկել: Ուղղաթիռը պայթել է, դեպքի վայրում աշխատել են հրշեջ փրկարարներն ու բժիշկները.

 «Խորը ցավով հաստատում ենք, որ ակումբի սեփականատեր Վիչայ Շրիվադդհանապրաբհան եղել է այն մարդկանց թվում, ովքեր ողբերգական կերպով մահացել են շաբաթ երեկոյան, երբ ուղղաթիռը նրա և ևս 4 ուղևորների հետ պայթել է «Քինգ Փաուեր» ստադիոնի մոտակայքում:

 Ուղղաթիռում գտնվող 5 ուղևորներից և ոչ մեկը չի փրկվել:

 Մեր բոլոր մտքերը Շրիվադդհանապրաբհայի ընտանիքի և այն ընտանիքների հետ են, ովքեր կրել են այս անդառնալի կորուստը: Ի դեմս Վիչայի` մենք կորցրել ենք հիանալի մարդու, բարի, առատաձեռն, իր ընտանիքին նվիրյալ մի մարդու, որին նա շատ էր սիրում և հիանալի ղեկավարում էր: «Լեսթեր Սիթին» նրա ընտանիքն էր»,- ասվում է ակումբի տարածած պաշտոնական հաղորդագրության մեջ:

 Շրիվադդհանապրաբհան 2010 թվականին է գնել «Լեսթեր Սիթին»: 2015/16 մրցաշրջանում ակումբն իր պատմության մեջ առաջին անգամ դարձել էր Անգլիայի չեմպիոն: 

Թայլանդցի բիզնեսմենը 60 տարեկան էր: