Ջոն Բոլթոնի հետ Հայաստանը չի քննարկել ԱՄՆ-ի կողմից Ադրբեջանին և Հայաստանին զենք վաճառելու հավանականությունը

ԱՄՆ նախագահի՝ Ազգային անվտանգության հարցերով խորհրդական Ջոն Բոլթոնի հետ Հայաստանը չի քննարկել ԱՄՆ-ի կողմից Ադրբեջանին և Հայաստանին զենք վաճառելու հավանականությունը: Tert.am-ի հետ զրույցում այս մասին ասաց ՀՀ պաշպանության նախարարության մամուլի խոսնակ Արծրուն Հովհաննիսյանը:

«Չենք քննարկել հարցը, հետևաբար այլ բան չեմ կարող ասել»,- ասաց նա՝ պատասխանելով հարցին, թե ինչ դիրքորոշում ունեն այս հարցի և ԱՄՆ-ի Կոնգրեսի կողմից Ազատության աջակցության վերաբերյալ ակտի 907-րդ փոփոխության հնարավոր չեղարկման վերաբերյալ:

Արծրուն Հովհաննիսյանը թեմայի հետ կապված միայն ասաց. «Մենք ամերիկյան ոչ խոցող զենքեր ու սարքավորումներ օգտագործում ենք խաղաղապահ ստորաբաժանումներում արդեն տևական ժամանակ և դժգոհություններ չունենք»։

Հիշեցնենք, որ Հայաստանում լրագրողների հետ զրույցում ԱՄՆ նախագահի՝ Ազգային անվտանգության հարցերով խորհրդական Ջոն Բոլթոնը, պատասխանելով հարցին, թե կարող է արդյոք երաշխավորել, որ Ազատության աջակցության մասին ակտի 907-րդ փոփոխության չեղարկումը չի հանգեցնի անհավասարակշռության, և հնարավոր է, որ ԱՄՆ-ը, ի վերջո, զենքեր վաճառի Ադրբեջանին և ՀՀ-ին, նշել էր․

«Ես չեմ կարող կանխատեսել, թե ինչ ընթացք կունենա կողմերին զենք վաճառելու վերաբերյալ հարցը: Իրավիճակն այնպիսին է, որ Հայաստանը սպառազինությունը ձեռք է բերում Ռուսաստանից, Ադրբեջանի սպառազինության 80 տոկոսը նույնպես ռուսական է: Այս հանգամանքը չի նպաստում հակամարտության կարգավորմանը, քանի որ Ռուսաստանի համար կողմերի վրա ճնշման մեծ լծակ է և խաղաղության չի բերում»: