Նոր մանրամասներ Մասիսի քաղաքապետի եւ նրա եղբոր քրեական գործերով (Տեսանյութ)

ՀՀ քննչական կոմիտեի Երեւան քաղաքի քննչական վարչությունում քննվող քրեական գործով շարունակվում են կատարվել անհրաժեշտ քննչական եւ դատավարական այլ գործողություններ՝ պարզելու 2018թ.ապրիլի 16-ին Երեւան քաղաքի Հերացի եւ Կորյուն փողոցների խաչմերուկում տեղի ունեցած միջադեպի, ապրիլի 22-ին Էրեբունի վարչական շրջանում տեղի ունեցած անկարգությունների, ինչպես նաեւ՝ Արարատի մարզի Հայանիստ-Հովտաշատ գյուղերի խաչմերուկի մոտ արձանագրված զենքի գործադրմամբ խուլիգանության բոլոր հանգամանքները, ենթադրյալ հանցագործություն կատարած անձանց շրջանակը։

ՀՀ Քննչական կոմիտեի տարածած հաղորդագրության մեջ նաեւ ասվում է.

«Հաշվի առնելով նշված քրեական գործերի նկատմամբ հասարակության մեծ հետաքրքությունը՝ տեղեկացնում ենք, որ նշված 3 դեպքերի առթիվ հարուցված քրեական գործերը, ՀՀ քրեական դատավարության օրենսգրքով սահմանված կարգով, միացվել են մեկ վարույթում, որով նախաքննությունն իրականացվում է ՀՀ քննչական կոմիտեի Երեւան քաղաքի քննչական վարչությունում։

Մշակվել է քննչական պլան եւ ձեռնարկվում են քննչական եւ օպերատիվ-որոնողական մեծածավալ միջոցառումներ՝ ըստ դրվագների բազմակողմանի օբյեկտիվ եւ լրիվ քննությունն ապահովելու, ենթադրյալ հանցագործություն կատարած անձանց շրջանակը հստակեցնելու, նրանց գործողություններն անհատականացնելու եւ համապատասխան քրեաիրավական գնահատական տալու ուղղությամբ։

Արդյունքում՝ բավարար ապացույցներ են ձեռք բերվել՝ ապրիլի 22-ին Էրեբունի վարչական շրջանում տեղի ունեցած անկարգություններին, Արարատի մարզի Հայանիստ-Հովտաշատ գյուղերի խաչմերուկի մոտ արձանագրված զենքի գործադրմամբ խուլիգանությանը Մասիսի քաղաքապետ Դավիթ Համբարձումյանի, իսկ Երեւան քաղաքի Հերացի եւ Կորյուն փողոցների, ինչպես նաեւ՝ Արարատի մարզի Հայանիստ-Հովտաշատ գյուղերի խաչմերուկների մոտ արձանագրված միջադեպերին Գոռ Համբարձումյանի առնչության վերաբերյալ։

Այսպես՝ նախնական քննության տվյալներով՝ 2018թ. ապրիլի 16-ին` ժամը 10:10-ի սահմաններում, Մասիսի քաղաքապետի եղբայր Գ.Համբարձումյանը, հասարակական կարգը կոպիտ կերպով խախտելու դիտավորությամբ, մի խումբ անձանց հետ բացահայտ անհարգալից վերաբերմունք է դրսեւորել հասարակության նկատմամբ, Երեւան քաղաքի Հերացի եւ Կորյուն փողոցների խաչմերուկում խուլիգանական մղումներով հայհոյանքներ է հնչեցրել նշված փողոցների խաչմերուկը փակած ցուցարարների հասցեին, բռնություն գործադրել բողոքի ակցիայի մի քանի մասնակիցների նկատմամբ: Բացի այդ, պարզվել է,որ վերջինս մասնակցություն է ունեցել նաեւ Արարատի մարզի Հայանիստ-Հովտաշատ գյուղերի խաչմերուկում ապրիլի 22-ին արձանագրված միջադեպին։

Ավելի վաղ տեղեկացրել ենք, որ Արարատի մարզի մի շարք բնակիչներ ապրիլի 22-ին երթով շարժվել են դեպի Երեւան՝ մասնակցելու ժամը 19-ին Հանրապետության հրապարակում նախատեսված հանրահավաքին։

Երթն արգելելու համար ժամը 16:00-17:00-ի սահմաններում մի խումբ անձինք, առանց հաշվառման համարանիշերի ավտոմեքենաներով, Արարատի մարզի Հայանիստ-Հովտաշատ գյուղերի խաչմերուկում փակել են դեպի Երեւան տանող ճանապարհը, բռնություն գործադրել երթի մասնակիցների նկատմամբ, կիրառել հրազեն, որի հետեւանքով մի շարք գյուղացիներ ստացել են վնասվածքներ, որոնցից մեկը՝ հրազենային։

Ըստ քննությամբ ձեռք բերված ապացույցների՝ Արարատի մարզում արձանագրված նշված խուլիգանությանը Գոռ Համբարձումյանի հետ միասին առնչություն է ունեցել նաեւ Մասիսի քաղաքապետ Դավիթ Համբարձումյանը։

Ավելին՝ բավարար փաստական տվյալներ են ձեռք բերվել առ այն, որ նա մասնակցություն է ունեցել նույն օրը՝ ժամեր առաջ, Էրեբունի վարչական շրջանում տեղի ունեցած անկարգությունների կազմակերպմանը, որի ժամանակ մի խումբ անձինք, նրանցից ոմանք՝ բժշկական դիմակներով, հարձակվել են բողոքի ակցիա իրականացնող քաղաքացիների վրա եւ քարերով, մահակներով, էլեկտրահարող սարքերով բռնություն գործադրել։ Բռնությունների հետեւանքով տուժել են նաեւ բողոքի ակցիան լուսաբանող լրագրողներ։

Ձեռք բերված ապացույցների համակցությամբ՝ հուլիսի 5-ին որոշում է կայացվել՝ Դավիթ եւ Գոռ Համբարձումյաններին նոր մեղադրանք առաջադրելու մասին. Մասիսի քաղաքապետ Դավիթ Համբարձումյանին մեղադրանք է առաջադրվել ՀՀ քրեական օրենսգրքի 225-րդ հոդվածի 1-ին եւ 2-րդ մասերով եւ ՀՀ քրեական օրենսգրքի 258-րդ հոդվածի 4-րդ մասով, իսկ Գոռ Համբարձումյանին՝ ՀՀ քրեական օրենսգրքի 258-րդ հոդվածի 3-րդ մասի 1-ին կետով եւ ՀՀ քրեական օրենսգրքի 258-րդ հոդվածի 4-րդ մասով:

Քննիչը միջնորդություններ է ներկայացրել դատարան՝ նրանց նկատմամբ որպես խափանման միջոց կալանավորումը կիրառելու մասին, որոնք բավարարվել են:

Ընդհանուր առմամբ՝ քրեական գործով տուժող է ճանաչվել 13 անձ, 12 անձ՝ ներգրավվել որպես մեղադրյալ, որոնցից 2-ի նկատմամբ հայտարարվել է հետախուզում։

Քրեական գործով նախաքննությունը շարունակվում է։

Այս թեմայով ՀՀ քննչական կոմիտեի շենքից 590 000 դոլար գողանալու դեպքից հետո պաշտոնանկություններ են եղել Երիտասարդը բարձրաձայն հայհոյել է, իսկ հետո դանակով հարվածել իրեն դիտողություն անողին ՀՔԾ պարզաբանումը՝ Արա Բաբլոյանի հայտարարության առնչությամբ. մանրամասներ հարցաքննությունից Քոչարյանի դատի ժամանակ հավաքի մասնակցին ծեծելու դեպքի առթիվ մեղադրանք է առաջադրվել. բազմաբեկոր, տեղաշարժված կոտրվածքներ 33-ամյա ալֆոնսը, ամուսնանալու խոստում է տվել եւ խաբերութամբ գումար հափշտակել 11 «հարսնացուներից». ՔԿ