Երևանի Անգլիական այգում մեկնարկել է Մանկական գրքի փառատոնը

Երեխաների պաշտպանության միջազգային օրվան ընդառաջ՝ այսօր Երևանի Անգլիական այգում տեղի է ունեցել Մանկական գրքի փառատոնի բացման հանդիսավոր արարողությունը: Մայրաքաղաքի մշակութային օրացույցում իր ուրույն տեղն զբաղեցնող փառատոնն այս տարի նշում է գործունեության 5-ամյակը, հայտնում են ԿԳՄՍ նախարարությունից։

Միջոցառումն իրականացվում է ՀՀ կրթության, գիտության, մշակույթի և սպորտի նախարարության և Երևանի քաղաքապետարանի աջակցությամբ ։

Բացման հանդիսավոր արարողությանը ողջույնի և շնորհավորական խոսքով հանդես են եկել ՀՀ ԿԳՄՍ նախարարի տեղակալ Դանիել Դանիելյանը և «Զանգակ» գրատան հիմնադիր տնօրեն Սոկրատ Մկրտչյանը։

Նրանք կարևորել են գրքի ու ընթերցանության դերը երեխաների կրթության ու դաստիարակության գործում, ինչպես նաև ընդգծել պետական կառույցների և մասնավոր հատվածի համագործակցության անգնահատելի նշանակությունը նմանատիպ մշակութային մեծածավալ նախագծերի կայացման հարցում։

Մանկական գրքի փառատոնն 5 տարի շարունակ փոքրիկների և համար դառնում է գրքի, հեքիաթի ու ստեղծարարության իսկական տոն։ Այն իր շուրջն է համախմբում փոքրիկ ընթերցողներին, հրատարակիչներին, գրողներին և արվեստասերներին՝ նպաստելով մանկապատանեկան գրականության զարգացմանն ու ընթերցանության խրախուսմանը ։

Այս տարվա հոբելյանական փառատոնին մասնակցում են ոլորտի առաջատար հրատարակչություններն ու կրթամշակութային կազմակերպությունները: