ԱՄՆ-ն կոչ է արել Իսրայելին հետաձգել հարձակումը սիրիա-լիբանանյան սահմանին գտնվող «Ալ-Մասնա» անցակետի վրա. Kan

Իսրայելական Kan ռադիոկայանը հաղորդել է, որ ԱՄՆ-ն կոչ է արել Իսրայելի իշխանություններին «քաղաքական պատճառներով» հետաձգել հարձակումը սիրիա-լիբանանյան սահմանին գտնվող «Ալ-Մասնա» անցակետի վրա և այդ հարցը թողնել սիրիական անվտանգության ուժերին։ Ահմեդ ալ Շարաայի գլխավորած Սիրիայի կառավարությունն ԱՄՆ-ի միջոցով փոխանցել է, որ ինքնուրույն է հակազդում «Հըզբոլլահին» և կանխում զենքի մաքսանենգությունը Սիրիայից Լիբանան։

Իսրայելի պաշտպանության բանակը նախկինում հայտարարել էր, որ «Հըզբոլլահն» այդ անցակետն ու հարակից M30 ճանապարհն օգտագործում է ռազմական նպատակներով։ ՑԱՀԱԼ-ը պատրաստվում էր հարվածել և բնակիչներին ու պետական ​​ծառայողներին կոչ էր արել լքել «Ալ-Մասնա»-ի տարածքը։ Զգուշացումից հետո Սիրիայի սահմանային վերահսկողության և մաքսային վարչությունը հայտարարել է անցակետի ժամանակավոր փակման մասին։ Ահմեդ ալ Շարաան նշել է, որ Դամասկոսը մտադիր է կանխել զենքի մաքսանենգությունն իր տարածքով։