Փարիզում Մակրոնի քարոզարշավի ֆինանսավորման գործի կապակցությամբ խուզարկություններ են իրականացվել

Իրավապահ մարմինները խուզարկություններ են անցկացրել ամերիկյան McKinsey խորհրդատվական ընկերության Փարիզի գրասենյակում, որը կասկածվում է Ֆրանսիայի նախագահ Էմանուել Մակրոնի նախընտրական քարոզարշավները անօրինական կերպով ֆինանսավորելու մեջ, հաղորդում է Le Figaro-ն՝ հղում անելով աղբյուրին։

Խուզարկությունը տեղի է ունեցել նոյեմբերի 6-ին՝ Փարիզի քննիչ դատավոր Սերժ Տուրնյորի գլխավորած հետաքննության շրջանակներում, որը վերաբերում է Ֆրանսիայի նախագահի նախընտրական քարոզարշավին խորհրդատվական ընկերությունների ներգրավվածությանը։

Ֆրանսիայի ֆինանսական դատախազությունը Մակրոնի դեմ հետաքննություն սկսեց 2022 թվականի նոյեմբերին՝ կասկածելով, որ McKinsey-ն անօրինական կերպով ֆինանսավորել է նրա 2017 և 2022 թվականների ընտրարշավները։ Դատախազությունը մտադիր էր հետաքննել, թե արդյոք խորհրդատվական ընկերության և պետության ղեկավարի միջև կապեր կային, որոնք կարող էին հանգեցնել ֆավորիտիզմի և քարոզարշավի անօրինական ֆինանսավորման։