Թրամփը կրկին սպառնացել է պատժամիջոցներ կիրառել Ռուսաստանի առևտրային գործընկերների նկատմամբ

ԱՄՆ Հանրապետական ​​կուսակցության անդամները մշակում են օրենսդրական փաթեթ, որը պատժամիջոցներ կկիրառի ցանկացած երկրի նկատմամբ, որը կշարունակի գործարքներ կնքել Ռուսաստանի հետ։ ԱՄՆ նախագահ Դոնալդ Թրամփն այդ մասին հայտարարել է կիրակի օրը՝ նոյեմբերի 16-ին, Ֆլորիդայում՝ Air Force One ինքնաթիռում, լրատվամիջոցների հետ զրույցի ժամանակ։

Զրույցի ընթացքում լրագրողներից մեկը հարցրել է, թե արդյո՞ք ԱՄՆ Կոնգրեսը ճնշում կգործադրի Ռուսաստանի և ՌԴ նախագահ Վլադիմիր Պուտինի վրա՝ Ուկրաինայում պատերազմը դադարեցնելու ուղղությամբ։ «Ես լսել եմ, որ նրանք աշխատում են այդ ուղղությամբ, և ես համաձայն եմ դրա հետ։ Հանրապետականները առաջ են մղում շատ ուժեղ օրինագիծ, որը պատժամիջոցներ կկիրառի Ռուսաստանի հետ գործարք կնքող ցանկացած երկրի նկատմամբ»,- պատասխանել է Թրամփը։

ԱՄՆ նախագահի խոսքով՝ Իրանը կարող է համալրել այդ երկրների ցանկը։

Ռուսաստանի գործընկերների նկատմամբ 500% մաքսատուրք կիրառելու գաղափարը քննարկվում է ԱՄՆ-ում ապրիլից ի վեր։

Ապրիլին սենատորներ Լինդսի Գրեհեմը և Ռիչարդ Բլումենտալը կոչ են արել մինչև 500% առևտրային մաքսատուրք սահմանել այն երկրների նկատմամբ, որոնք Ռուսաստանից նավթ, գազ, ուրան և այլ ապրանքներ են գնում։

«Հնդկաստանը և Չինաստանը շարունակում են գնել ռուսական նավթի 70%-ը՝ շարունակելով աշխատեցնել նրա ռազմական մեքենան։ Իմ օրինագիծն ունի 84 սենատորի աջակցությունը։ Այն թույլ կտա պատժամիջոցներ կիրառել Հնդկաստանի, Չինաստանի և այլ երկրների նկատմամբ՝ Պուտինի ռազմական մեքենայի ֆինանսավորումը դադարեցնելու և նրան բանակցային սեղանի շուրջ նստեցնելու համար»,- բացատրել է սենատոր Գրեհեմը։