Փորձագետներ՝ Արմեն Չարչյանի քրեական գործով

ԱԺ «Հայաստան» խմբակցության պատգամավոր, «Իզմիրլյան» ԲԿ նախկին տնօրեն Արմեն Չարչյանի գործով այսօր հրավիրվել էր հրատապ դատական նիստ: Արմեն Չարչյանի առողջական վիճակը գնահատելու համար ձևավորվել է բժիշկներից բաղկացած փորձագիտական հանձնաժողով, ու այսօրվա նիստը հրավիրվել էր այդ հանձնաժողովում փորձագետներ ներգրավելու համար:

Դատավոր Վահե Միսակյանը հայտնեց, որ դատարանն առողջապահության նախարարից ստացել է գրություն՝ փորձագիտական հանձնաժողովի մասնագետների թեկնածուների վերաբերյալ, ու ներկայացրած ցուցակում առկա 10 փորձագետից այսօր դատարան էին ներկայացել 6-ը:

Հարցի քննությունն անցավ առանց մեղադրող դատախազ Մարգարյանի, որն ավելի վաղ դատարանին հայտնել էր, որ ծանոթանալով մասնագետների ցանկին, որևէ բացարկի միջնորդություն կամ հայտարարություն չունի: Պաշտպանական կողմը ևս բացարկի միջնորդություն չներկայացրեց:

Արդյունքում՝ Նաիրա Գոգյանը, Քրիստինե Սարգսյանը, Համլետ Հայրապետյանը, Լուսինե Թունյանը, Արշակ Ղազարյանը և Սուլթանյանը որպես փորձագետ ներգրավվեցին այս գործում՝ հանձնաժողովային դատաբժշկական փորձաքննություն իրականացնելու համար:

Հիշեցնենք, որ ավելի վաղ Չարչյանի պաշտպանները դատարանին էին ներկայացրել բժշկական հետազոտությունների արդյունքներ՝ նշելով, որ իրենց պաշտպանյալի նկատմամբ հնարավոր չէ անազատության պայմաններում պատշաճ և արդյունավետ բժշկական օգնություն ցուցաբերել: Պաշտպան Էրիկ Ալեքսանյանը նաև հայտնել էր, որ բժշկական կենտրոնում գտնվող Արմեն Չարչյանի առողջական վիճակը շատ վատ է՝ նա շնչում է սարքերի օգնությամբ: Դատախազի պնդմամբ՝ պաշտպանների ներկայացրած միջնորդությունը ենթակա էր մերժման: Ըստ մեղադրող Մարգարյանի՝ Չարչյանն անազատության պայմաններում նոր հիվանդություն ձեռք չի բերել, հետևաբար՝ անհիմն ու անտրամաբանական է Չարչյանի առողջական վիճակի փոփոխությունը կապել անազատության մեջ գտնվելու հետ: Դատարանն էլ հետաձգել էր Չարչյանի պաշտպանների՝ Արմեն Չարչյանի նկատմամբ կիրառված խափանման միջոց կալանավորումը գրավով փոխարինելու վերաբերյալ միջնորդության քննությունը՝ մինչև փորձագիտական եզրակացություն ստանալը:

Մեղադրական եզրակացության համաձայն՝ «Արմեն Չարչյանը մեղադրվում է, որ որպես «Իզմիրլյան» բժշկական կենտրոն ՓԲԸ գործադիր տնօրեն, նույն բժշկական կենտրոնի աշխատակիցներին հարկադրել է մասնակցել 2021թ. հունիսի 20-ին կայանալիք ՀՀ Ազգային ժողովի արտահերթ ընտրություններին, չքվեարկել «Քաղաքացիական պայմանագիր» կուսակցության օգտին, այլ քվեարկել «Հայաստան» դաշինքի օգտին, և ըստ մեղադրանքի՝ դա կատարել է՝ օգտվելով աշխատակիցների՝ իրենից ծառայողական կախվածություն ունենալու հանգամանքը։