Խաղաղապահ առաքելություն իրականացնող զորախմբերից որևէ մեկում կորոնավիրուսով վարակման դեպք չկա. Արտակ Տոնոյան
Զինված ուժերում շարունակվում են համաճարակային խիստ միջոցառումներ ձեռնարկել կորոնավիրրուսի ներթափունցումը կանխելու համար: Այս մասի ֆեյսբուքյան էջի ուղիղ եթերում ասաց ՀՀ ՊՆ մամուլի խոսնակ Շուշան Ստեփանյանը:
«Մեր զինծառայողների առողջական վիճակը լավ է, չորս զինծառայող անգամ չունեն ջերմություն, կորոնավիրուսի ոչ մի ախտանշան, իսկ մեկ զինծառայողի մոտ թույլ արտահայտված ջերմություն է»,-ասաց նա և հայտնեց նաև, որ այսօր նոր նմուշառումներ, նոր մեկուսացածներ չունեն, իսկ արդեն մեկուսացվածների վիճակը լավ է, տրամադրությունը բարձր:
Անդրադառնալով այլ երկրներում խաղաղապահ առաքելություններ իրականացնողներին՝ Շուշան Ստեփանյանը հայտնեց, որ մեր զորախմբերի զինծառայողներն առողջ են, կատարում են իրենց առաջ դրած խնդիրները։ Նրա հետ զրույցում խաղաղապահ բրիգադի հրամանատար, գնդապետ Արտակ Տոնոյանը խոսեց խաղաղապահների շրջանում կորոնավիրուսի տարածումը կանխելու միջոցառումների մասին։
«Աֆղանստանում, Լիբանանում և Կոսովոյում առաքելություն իրականացնող ՀՀ ՊՆ խաղաղապահ զորքերի զինծառայողներից ոչ ոքի մոտ նոր տիպի կորոնավիրուսի վարակման դեպք չի հայտնաբերվել, նույնիսկ կոնտակտավոր չկա»,- ասաց Արտակ Տոնոյանը՝ ընդգծելով, որ իրենք մշտական կապի մեջ են արտերկրում խաղաղապահ առաքելություն իրականացնող զորախմբերի հետ։
Այնուհետև տեսակապի միջոցով կապ հաստատվեց Լիբանանում, Կոսովոյում, Աֆղանստանում գտնվող զորախմբերի հրամանատարների հետ։
Աֆղանստանի զորախմբի հրամանատար, փոխգնդապետ Կարեն Թադևոսյանը ներկայացրեց, թե ինչպիսի միջոցառումներ են իրականացնում ծառայոությունն անխափան իրականացնելու համար․ «Մեր խաղաղապահներն իրականացնում են Աֆղանստանի Մազար-Է-Շարիֆ քաղաքից ոչ շատ հեռու տեղակայված ռազմաբազաներից մեկի պաշտպանությունը։ Այս պահին վիրուսի հետ կապված ոչ մի խոչընդոտող հանգամանք չկա։ Զինծառայողներին բաժանվել են սպիրտային լուծույթներ, որպեսզի նրանք հնարավորություն ունենան հաճախակի ախտահանել իրենց ձեռքերը»,- ասաց նա և ընդգծեց, որ ծառայությունն իրականացվում է անխափան կերպով։
Կոսովոյի զորախմբի հրամանատար, մայոր Արմեն Սարգսյանը հայտնեց, որ ալկոգելով օրական նվազագույնը 6-7 անգամ ախտահանում է կատարվում։
«Մեր անձնակազմն առողջ է, հրամանատարությունը կատարում է բոլոր միջոցառումները, որպեսզի կորոնավիրուսը չտարածվի։ Այստեղ 1 հոգի, ոչ մեր անձնակազմից՝ ազգությամբ բուլղարացի, վարակվել է 3 օր առաջ, երբ վերադարձել է արձակուրդից, որից 1 օր հետո նա հոսպիտալացվել է և մեկուսացվել»,- նշեց Սարգսյանը։
Լիբանանի զորախմբի հրամանատար, կապիտան Արտակ Պետրոսյանը տեղեկացրեց, որ կորոնավիրուսի տարածումը կանխելու համար պահպանվում են հիգիենայի բոլոր կանոնները։ «Իտալացիների կողմից այստեղ իրականացվել են դասընթացներ, թե ինչպես զերծ մնանք կորոնավիրուսով վարակվելուց և դրա տարածումից։ Ներկա պահին մեր 32 զինծառայողից բաղկացած անձնակազմը կատարում է հերթապահություն՝ դիմակներով և ձեռնոցներով։ Մենք ծառայություն ենք իրականացնում 24/7 ռեժիմով, ապահովելով անվտանգություն։ Մեր անձնակազմն ապահովված է բժշկական ձեռնոցներով, սպիրտով և դիմակներով»,- ասաց նա։