2020 թ. բյուջեով «Սանիթեքին» տրամադրվող գումարից շուրջ 600 մլն դրամով ավել գումար է հատկացվում նոր հիմնարկին
Երևանի 2020 թվականի բյուջեով «Սանիթեքին» տրամադրվող գումարից շուրջ 600 միլիոն դրամով ավել գումար է տրամադրվում նոր հիմնարկին. այս մասին Tert.am-ի հետ զրույցում ասաց Երևանի ավագանու «Լույս» խմբակցության քարտուղար ԱՆի խաչատրյանը:
««Սանիթեքին» տարեկան տալիս էին մոտ 5 մլրդ 200 մլն դրամ, հիմա նոր հիմնարկին էլ տալիս ենք նույն չափը, բայց այստեղ կա խնդիր, «Սանիթեքը» ծառայության արժեքի 20 տոկոս հարկ էր վճարում, իսկ նոր հիմնարկն այդ հարկը չի վճարում: Այսինքն՝ մոտ 600 մլն-ով ավել է իր գումարը «Սանիթեքից» կազմում»,- ասաց նա:
Ըստ Խաչատրյանի՝ այստեղ վտանգ կա: «Եթե հիշում եք՝ «Սանիթեքն» ասում էր, որ իր գումարը չի բավարարում և այո, այստեղ վտանգ կա, և այս պահին ինձ թվում է՝ դրա ժամանակը չէր, ավելի քիչ գումար պետք է հատկացվեր: Հիմա նոր հիմնարկը «Սանիթեքի» առնվազն առաջին տարվա չափ աշխատանք պետք է իրականացներ, մանավանդ 600 մլն-ով ավել գումար: Մենք աղբաման դատարկելով՝ ասում ենք, թե աղբահանություն ենք իրականացնում, բայց ո´չ բունկերներն են լիարժեք դատարկվում, ո´չ էլ սանմաքրման աշխատանքներ կան, նորից կրկնում եմ՝ 600 մլն «Սանիթեքից» ավել գումար ծախսելով»,- նշեց նա:
Ըստ Խաչատրյանի՝ 1 մլրդ 130 մլն էլ առանձին աղբի մեքենաներ ձեռք բերելու և այլ ծախսերի համար է հատկացվել նոր հիմնարկին, իսկ «Սանիթեքին» դա չէր տրամադրվում: «Իսկ «Սանիթեքը այդ 5 մլրդ-ով նաև իր աղբի մեքենաներն էր գնում, մնացած տեխնիկական հարցերն էր լուծում, մենք առանձին նրան գումար չէինք տալիս, իսկ այստեղ 1 մլրդ 130 մլն-ի չափով էլ առանձին գումար ենք տալիս»,- պարզաբանեց նա:
Անի Խաչատրյանը շեշտեց, որ պետք է նոր հիմնարկից պահանջել, որ շատ ավելի լավ աշխատի, համապատասխան արդյունքներ գրանցի՝ տված գումարին համարժեք:
Անդրադառնալով քաղաքապետարանի հնգամյա զարգացման ծրագրին՝ Անի Խաչատրյանը տեղեկացրեց, որ գեթ մեկ վերելակ փոխելու մասին խոսք անգամ չկա այդ ծրագրում: «Փոքր շինթույլտվությունների՝ 200-500 քմ, տուրքերն են բարձրանում, 70 հազար դրամը դառնում է 105 հազար դրամ, իսկ 150 հազարը դրամը՝ 200 հազար դրամ. այսինքն՝ տուրքերը բարձրանում են»,-նշեց նա:
«Լույս» խմբակցության քարտուղարը նշեց՝ ոչ մի ստորգետնյա, վերգետնյա անցումի մասին զարգացման ծրագրում խոսք չկա: «Մետրոյի, ճոպանուղու համար գրված է՝ սկիզբը 2019 թվականին, իսկ ավարտը կախված է ներդրումից. այսինքն՝ ներդրող կհայտնվի՝ կանեն, չի հայտնվի՝ չեն անի»,- ասաց նա:
Ինչ վերաբերում է հարցին, թե արդյոք զարգացման ծրագրում խոսք կա տրանսպորտային ցանցի վերաբերյալ, Անի Խաչատրյանը տեղեկացրեց, որ նոր տրանսպորտային ցանցով պետք է 348 կանգառասրահ վերանորոգվի, 2019-ին 130 կանգառ է նախատեսվում նորոգել:
«Տրանսպորտի նոր ցանցով նախատեսված էր, որ կանգառների տեղերը պետք է փոխվեին, հարմարեցվեր տրանսպորտի նոր ցանցին, բայց այստեղ գրված է, որ 130 կանգառ է կահավորվելու: Ողջունելի էր միայն այն, որ գրված էր 100 տրոլեյբուս պետք է բերվի 20-21 թվականներին: Բայց դա էլ դեռ չի արվել, միայն խոսվում է դեռ»,- հայտնեց նա:
Ըստ Անի Խաչատրյանի՝ Կոնդ թաղամասի վերաբերյալ հնգամյա ծրագրում միայն խոսք կա ուսումնասիրության ու հանձնաժողով ստեղծելու մասին, և ոչ մի լուծում չի առաջարկվում, այլ միայն ուսումնասիրություն: «Այսինքն՝ ամբողջ ծրագիրն է այդպես, ոչ մի հստակ բան չկա»,- նշեց նա:
Անի Խաչատրյանի խոսքով՝ ամենաաբսուրդայինն այն է, որ մեկ տարվա ընթացքում կան թերի ծախսեր: «Թերակատարումներ կան. երբ քաղաքում չկար քաղաքապետ, քաղաքային իշխանություն, այդ ընթացքում նորմալ էր, որ թերծախսեր լինեին, որովհետև աշխատանքներ չէին իրականացվում, և բյուջեում ավելցուկ էր եղել, որով էլ ձեռք բերվեցին աղբատար մեքենաները: Բայց այս տարի ավելի շատ թերծախսեր կան, թե կանաչապատման, թե մնացած մասերով թերծախսեր կան: Երբ կատարողականը կլինի, այդ ժամանակ կարող ենք ասել, թե ինչի վրա է եղել թերծախսերը: Մեր քաղաքում դա աբսուրդային է, որովհետև մենք այնքան ծախսեր ունենք կանաչապատման և մնացած ոլորտներում»,- ասաց նա և նշեց, որ այս ամենի վերաբերյալ իրենք առաջարկներ ունեն, առաջիկայում դրանք կներկայացնեն և կհրապարակեն: