Վրաստանը հայտնել է ՀՀ-ի եւ Ադրբեջանի ղեկավարների միջեւ բանակցություններ վարելու պատրաստակամության մասին
Վրաստանի նախագահ Սալոմե Զուրաբիշվիլին դիմել է Հայաստանի եւ Ադրբեջանի ղեկավարներին` ասելով, որ պատրաստ է Թբիլիսիում հարթակ կազմակերպել` ղարաբաղյան հակամարտության կարգավորման շուրջ ցանկացած ձեւաչափով բանակցություններ վարելու համար:
«Ես ուզում եմ դիմել երկու երկրների նախագահներին եւ իշխանություններին [Հայաստան եւ Ադրբեջան], նրանց միջեւ հնարավորինս շուտ երկխոսությունը վերականգնելու եւ դեէսկալացման եւ հրադադարի կոչ անելու համար: Մենք պատրաստ ենք ամեն ինչի, ինչ կողմերը կցանկանան»,- ասել է Զուրաբիշվիլին շաբաթ օրը ղարաբաղյան հակամարտությանը նվիրված Ազգային անվտանգության խորհրդի նիստից հետո կայացած ճեպազրույցում:
Նախագահը դիմել է նաեւ ԵԱՀԿ Մինսկի խմբի համանախագահներին` նշելով, որ նրանց դերը մեծ է հակամարտության կարգավորման գործընթացում: Նա նաեւ խնդրում է ԵՄ-ին միջամտել եւ նպաստել հրադադարի ռեժիմին, քանի որ Կովկասի բոլոր երեք երկրներն Արեւելյան գործընկերության ծրագրի մասնակից են: «Եվրամիությունը հետաքրքրված է կայունությամբ եւ խաղաղությամբ այս տարածաշրջանում: Այն պետք է օգտագործի իր ուժերը հանուն խաղաղության եւ իրավիճակի դեէսկալացման»,- հավելել է պետության ղեկավարը: