«Թուրքիան առանց F-35 ծրագրի կզրկվի 9 մլրդ դոլարի ներդրումներից». Պենտագոնի պաշտոնյա
Թուրքիան ռուսական С-400 զենիթահրթիռային համալիրների գնման պատճառով ամերիկյան F-35 կործանիչների ծրագրի գծով համագործակցությունից զրկվելու մասին ԱՄՆ վարչակազմի որոշման հետևանքով չի ստանա մոտ 9 մլրդ դոլարի ներդրումներ: Այդ մասին, ինչպես հայտնում է «ՌԻԱ Նովոստի» գործակալությունը, ասուլիսի ժամանակ հայտնել է ԱՄՆ ռազմական գերատեսչության ղեկավարի գնումների հարցերով տեղակալ Էլեն Լորդը:
«Թուրքիան ակնհայտորեն և ցավոք կկորցնի աշխատատեղեր ու որոշ տնտեսական հնարավորություններ: Երկիրը չի ստանա 9 մլրդ դոլար, որը պետք է նրան ուղղվեր F-35 ծրագրի շրջանակում»,- ասել է նա:
Ըստ նրա՝ Թուրքիան հնարավորություն է ունեցել F-35-ի համար արտադրելու ավելի քան 900 դետալ:
Ռուսական հակաօդային պաշտպանության համակարգերի գնումը ՆԱՏՕ-ի անդամ Թուրքիայի կողմից միջազգային սկանդալ է հրահրել. Միացյալ Նահանգները պահանջում է հրաժարվել գործարքից և փոխարենը ձեռք բերել ամերիկյան Patriot համակարգեր: Հրաժարվելու դեպքում Վաշինգտոնը հետևանքներով է սպառնացել:
Հիշեցնենք, որ Ռուսաստանի Դաշնության և Թուրքիայի միջև С-400 համակարգերի գնման շուրջ բանակցությունների մասին առաջին անգամ հայտնի էր դարձել 2016թ.-ի նոյեմբերին, իսկ վաճառքի մասին պայմանագիրը կնքվել էր 2017թ.-ի սեպտեմբերին, ընդ որում՝ ձեռք բերված զենիթահրթիռային 4 միավոր համակարգերի արժեքը 2,5 մլրդ դոլար է կազմել:
Օրեր առաջ՝ հուլիսի 12-ին, ռուսական C-400 համակարգերի առաջին խմբաքանակը մատակարարվել է Թուրքիա: ԱՄՆ մի խումբ սենատորներ կոչ են արել նախագահ Թրամփին պատժամիջոցներ սահմանել Թուրքիայի դեմ` ռուսական C-400-ների մատակարարման մեկնարկի առնչությամբ:
Միևնույն ժամանակ, Թուրքիայի նախագահ Ռեջեփ Թայիփ Էրդողանը C-400 համակարգերի մատակարարման գործարքը Ռուսաստանի հետ երկրի ժամանակակից պատմության կարևորագույն համաձայնագիր է անվանել: Էրդողանի խոսքով՝ C-400-ների մատակարարման գործընթացը, որը մեկնարկել է հուլիսի 12-ին, կարող է ավարտվել 2020-ի ապրիլին: