«Շնորհակալությո՛ւն, Ստամբուլ». ինչպես են Ստամբուլում տոնել քաղաքապետի ընդդիմադիր թեկնածուի հաղթանակը (լուսանկարներ)
Ստամբուլի քաղաքապետի կրկնակի ընտրություններում ընդդիմադիր Ժողովրդահանրապետական կուսակցության թեկնածու Էքրեմ Իմամօղլուի հաղթանակը նրա աջակիցները մեծ ցնծությամբ են տոնել, հաղորդում է Daily Mail-ը՝ հրապարակելով համապատասխան ֆոտոշարք և տեսանյութ:
Ժողովրդահանրապետական կուսակցությունը ներկայացնող քաղաքապետի թեկնածուի համակիրները հավաքվել են Ստամբուլի Բեյլիքդյուզյու շրջանում, ծածանել Թուրքիայի դրոշը:
Հաղթանակից հետո ունեցած ելույթի ժամանակ նոր քաղաքապետը շնորհակալություն է հայտնել Ստամբուլի բնակչությանը և հայտնել է, որ սրանով թե՛ Ստամբուլի, թե՛ Թուրքիայի համար «նոր փուլ» է սկսվում:
Շարունակելով ելույթը՝ 49-ամյա նախկին գործարարն ասել է. «Պարո՛ն նախագահ, ես պատրաստ եմ ներդաշնակորեն աշխատել Ձեզ հետ: Ես այստեղից հայտնում եմ իմ խնդրանքը՝ հնարավորինս կարճ ժամկետներում Ձեզ հետ հանդիպելու վերաբերյալ»:
Թուրքիայի ընդդիմադիր Ժողովրդահանրապետական կուսակցության թեկնածու Էքրեմ Իմամօղլուն հաղթել է Ստամբուլի քաղաքապետի կրկնակի ընտրություններում՝ ստանալով քվեների 54%-ը: Նրա գլխավոր մրցակիցը՝ իշխող «Արդարություն և զարգացում» կուսակցության թեկնածու, երկրի նախկին վարչապետ Բինալի Յըլդըրըմը, ընդունել է իր պարտությունը: Երկրի նախագահ Ռեջեփ Թայիփ Էրդողանը շնորհավորել է նոր քաղաքապետին:
Քաղաքապետի կրկնակի ընտրություն անցկացնելու որոշումը կայացվել էր այն բանից հետո, երբ իշխող կուսակցությունը հրաժարվել էր ընդունել ընդդիմադիր թեկնածու Իմամօղլուի հաղթանակը՝ պահանջելով նոր ընտրությունների անցկացում: