Որ երկիրը, որ լավ է բանակցում ՌԴ-ի հետ, սահմանը բացում է, օրինակ Թուրքիան. Ցուցարարը՝ Ալեն Սիմոնյանին

Ռուսաստանն ասում է՝ ես իմ երկիրը փակել եմ, կարանտին ա, չեմ թողնում մարդ մտնի. Հիմա ես իրեն ոնց պարտադրեմ, որ քեզ թողնի երկիր: Այս մասին, այսօր՝ սեպտեմբերի 4-ին, ԱԺ-ի դիմաց Ռուսաստան մեկնելու ցանկություն ունեցող ՀՀ քաղաքացիների բողոքի ակցիայի մասնակիցների հետ զրույցում ասաց ԱԺ փոխնախագահ Ալեն Սիմոնյանը:

«Այլ խնդիր է, որ ձեր կնոջն ու երեխաներին ՌԴ-ում Հայաստանի դեսպանատան միջոցով կազմակերպեմ, բերեմ Հայաստան: Քանի որ հիմա դուք չեք կարող մեկնել այնտեղ, իսկ ես Ռուսաստանի իշխանության վրա լծակ չունեմ, առաջարկում եմ այնտեղ ձեր ընտանիքի անդամներին բերենք այստեղ»,-ասաց նա:

Ակցիայի մասնակիցներից մեկն ասաց. «Որ երկիրը բանակցում է Ռուսաստանի հետ, սահմանը չի բացում, իսկ որ երկիրը լավ է բանակցում, բացում է: Օրինակ Թուրքիան: Հենց հիմա էլ թուրքերը գնում են Ռուսաստան աշխատելու»:

Ի պատասխան Ալեն Սիմոնյանն ասաց, որ չկա նման բան, որ ընդամենը երեք ինքնաթիռ է գնացել Թուրքիայից, որից հետո նորից դադարեցվել են չվերթները: ռուսները գնում են Թուրքիա հանգստանալու, ու հիմա նորից փակել են ճանապարհները, մարդիկ չեն կարողանում հետ վերադառնալ, քանի որ երկրորդ ալիքին են սպասում»:

Ալեն Սիմոնյանը հավելեց, որ հիմա Հայաստանը պատրաստ է թույլ տալ իր քաղաքացիներին մեկնել այլ երկրներ եւ այդ երկրներից մարդկանց ընդունել, մնում է այդ երկրները համաձայնեն: