Ցույց մի տվեք ձեր վախերը

ԱԺ «Իմ քայլը» խմբակցության պատգամավոր Նիկոլայ Բաղդասարյանը դիմեց ոստիկաններին, պնդեց, որ մի քաղաքացի փորձել է իրեն հեծանիվով վրաերթի ենթարկել, ասաց, որ անգամ իրեն հայհոյել են: Ուշադրություն դարձրեք, ոչ թե վրաերթի է ենթարկել:

Իմքայլական պատգամավորի, ընդ որում, միայն նրա ցուցմունքի վրա հիմնվելով ՀՀ քաղաքացի Արթուր Ալեքսանյանին ոչ միայն ձերբակալեցին, այլ կալանավորեցին: Բանականության մեջ այս ամենը դժվար է տեղավորվում, բայց մենք ապրում ենք մի իրականությունում, երբ Արսեն Թորոսյանը, լինելով Առողջապահության նախարար, հայտարարում է, որ չի կատարելու դատարանի պահանջը, քանի որ չի վստահում, վարչապետ Նիկոլ Փաշինյանն ասում է, թե ուզում եք հավատացեք, ուզում եք մի հավատացեք հնչող մեղադրանքներին, իսկ հեծանվորդին պատգամավորի ցուցմունքի հիման վրա կալանավորում են երկու ամսով:

Արթուր Ալեքսանյանի կալանավորումը վկայում է, որ կառավարող ուժը կորցրել է ինքնատիրապետումը եւ վախեցած է: Հակառակ դեպքում ոչ Նիկոլայ Բաղդասարյանը կդիմեր ոստիկանություն, ոչ էլ քրեական գործ կհարուցվեր: Հիմա կառավարող ուժը ցույց է տալիս իր վախերը:   

Արթուր Ալեքսանյանին, ինչպես պնդում են ոլորտի բարձրակարգ մասնագետները, բացահայտ անհիմն մեղադրանք է առաջադրվել: Ավելին, ՀՀ քաղաքացին այդ անհիմն մեղադրանքով կալանավորված է:

Եւ եթե կառավարությունում կարծում են, որ նման ձերբակալություններով եւ կալանավորումներով կարող են վախի մթնոլորտ ստեղծել, չարաչար սխալվում են: Ավելին, այս քայլերը ցույց է տալիս ոչ միայն ձեր վախերը, այլ արագացնում ձեր վերջնական պարտությունը:

Փորձեք կողքից նայել այս ամենին: Կառավարող ուժի ներկայացուցիչը, ՀՀ ԱԺ պատգամավորը շտապում է ոստիկանություն միայն նրա համար, որ մի հեծանվորդ անցել է իր կողքով եւ հայհոյել այս կամ այն օրինագիծն ընդունելու համար: Չկա եւ ոչ մի վկա, ոստիկանությունը հենվում է բացառապես պատգամավորի ցուցմունքների վրա, իսկ դատարանը նույն ցուցմունքը հիմք ընդունելով մարդուն կալանավորում են: Միայն թույլիկ կառավարող ուժը կգնար նման անհեթեթ քայլի: Սա ակնհայտ է:

Այսպիսով, ՀՀ քաղաքացին ոչ միայն կալանավորվել է, այլ նրան մեղադրում են մի հոդվածով, որով չեն կարող մեղադրել մի շատ պարզ պատճառով. Նիկոլայ Գրիգորյանը իշխանության ներկայացուցիչ չէ եւ չէր կարող հրաման կամ հրահանգ տար ՀՀ որեւէ քաղաքացու: Ավելին, Արթուր Ալեքսանյանը պնդում է, որ բռնություն չի գործադրել:

Արթուր Ալեքսանյանի կալանավորումը վկայում է այն մասին, որ գործ ունենք ինքնավստահությունը կորցրած, խուճապի մեջ գտնվող թույլիկ իշխանության հետ, որն իր կառավարումը երկարաձգելու համար փորձում է վախի մթնոլորտ ձեւավորել եւ կորոնավիրուսային համավարակն օգտագործելով արգելում հավաքների անցկացումը:

Եւ վերջում հարցի բարոյական կողմի մասին: Հետաքրքիր է, թե Նիկոլայ Բաղդասարյանը հաց ուտելիս կամ երբ պառկում է քնելու ի՞նչ է մտածում իր «հերոսական» արարքի մասին:  

Վարդան Մխիթարյան

Top-News.am