Փաշինյանն ակնարկեց, որ ամեն ինչ կանի այլեւս ասֆալտին փռելու, պատին ծեփելու կոչեր չանել

Վարչապետի ղեկավարած քաղաքական ուժը հանդես է գալիս բռնության խոսքի դեմ տարբեր օրենսդրական նախաձեռնություններով, սակայն հանրությունը բռնության խոսքի կոնկրետ կիրառման եւ դրա արդարացման է ականատես լինում ոչ միայն ԱԺ-ում, այլեւ հաճախ ձեր բառապաշարում։ Արդյոք վարչապետը չի՞ կարծում, որ ասֆալտին փռելը, պատերին ծեփելը, սամասուդ անելը, ցխելը եւ այլ արտահայտությունների կիրառումը հարիր չի երկրի բարձրագույն իշխանությանը։ Այսպիսի հարց հնչեց վարչապետ Նիկոլ Փաշինյանի մեծ ասուլիսի ժամանակ:

Փաշինյանն էլ ասաց, որ ոչ բոլոր արտահայտություններն է ինքը կիրառել, բայց այդ հարցի մեջ կար արդարացում. «Ոչ մեկ չի արդարացնում բռնության որեւէ դեպք։ Ինչը վերաբերում է բառապաշարին, տոնայնությանը եւ այլն, կարծում եմ՝ երեւի թե բոլորս էլ պետք է մտածենք, որ մթնոլորտի բարելավման համար բոլորս էլ անելիք ունենք, այդ թվում՝ ես։ Շնորհակալ եմ ձեր դիտարկման համար»։