Մեր նպատակը նաեւ առողջապահական համակարգի անտանելի գերբեռնվածությունը կանխելն է. Փաշինյան

Կորոնավիրուսի վարակը Առողջապահության միջազգային կազմակերպության տվյալների համաձայն նոր թափ է հավաքում: Այս մասին, այսօր՝ մարտի 24-ին, իր ուղերձում նշել է ՀՀ վարչապետ Նիկոլ Փաշինյանը:

Նա, մասնավորապես, նշել է.

«Աշխարհում ավելի քան 350 հազար կորոնավիրուսի հաստատված դեպք կա, ավելի քան 16 հազար մարդդ մահացել է վարակից:Ի՞նչ գիտենք մենք կոնորավիրուսի մասին: Դա մի վարակ է, որն արագորեն մարդուց անցնում է մարդուն օդակաթիլային եղանակով, ախտահարում է մարու շնչառական համակարգը, արտահայտվում է չոր եւ տեւական հազով, շնչարգելությամբ, որն ուղեկցվում է ջերմությամբ եւ հասնում ընդհուպ մինչեւ ծայրահեղ ծանրության թոքաբորբի:

Համաշխարհային եւ հայաստանյան փորձը սակայն ցույց տվեց, որ կորոնավիրուսով հիվանդը կարող է չունենալ ոչ մի ախտանշան: Այսինքն մարդը կարող է վարակված լինել, բայց չհազալ, ջերմություն չունենալ: Նման դեպքերում մարդը չի էլ կռահի, որ վարակակիր է եւ կբուժվի առանց որեւ միջամտության: Հետեւաբար, հիվանդությունը որեւէ վտանգ չի ներկայացնի նրա համար:

Խնդիրն այն է, որ այդ ընթացքում նա կարող է վարակել բազմաթիվ ընկերների, հարազատների: Նրանցից շատերի համար նույնպես հիվանդությունը մեծ վտանգ չի ներկայացնի:

Համաշխարհային փորձը ցույց է տալիս, որ վիրուսը հիմնականում անվտանգ է երիտասարդների, երեխաների համար եւ հիմնական զոհը դառնում են 70-ից բարձր տարիք ունեցող անձինք, ինչպես նաեւ խրոնիկ հիվանդություն ունեցողները:

Հետեւաբար, մեր հիմնական խնդիրը վատառողջ հայրենակիցների, մեր ծնողներին, տատիկ-պապիկներին պաշտպանելն է:

Իհարկե, վարակվելու փաստն ինքնին դատավճիռ չէ, աշխարհում ավելի քան հարյուր հազար մարդ բուժվել է կորոնավիրուսից, այդ թվում 70-անց մարդիկ: Արձանագրվել է նույնիսկ 105-ամյա պացիենտի բուժմանդ եպք:

Հենց սրան են ուղղված եղել մեր բոլոր գործողությունները: Մենք բոլոր դպրոցներում եւ ուսհաստատություններում ուսուցման պրոցեսը դադարեցրել ենք ոչ միայն երեխաներին վարակից պաշտպանելու, այլեւ նրանց միջոցով վարակի տարածումը թույլ չտալու համար:

Այս նպատակն ունեն նաեւ հետագայում կիրառված ավելի խիստ սահմանափակումները: Մեր խնդիրը ոչ միայն վարակի հետագա տարածումը թույլ չտալն է, այլեւ առավել խոցելի խմբերին պաշտպանելը եւ առողջապահական համակարգի անտանելի գերբեռնվածությունը կանխելը»: