ԱՄԷ-ն երկու շաբաթով դադարեցրել է ուղևորատար թռիչքները եւ տարանցումը երկրի տարածքով

Արաբական Միացյալ Էմիրությունները (ԱՄԷ) կիրակի որոշում են կայացրել երկու շաբաթով ամբողջությամբ դադարեցնել ուղեւորատար թռիչքները: Այս մասին հաղորդել է էմիրական WAM լրատվական գործակալությունը, փոխանցում է ՏԱՍՍ-ը:

«Որպես նոր կորոնավիրուսի տարածման դեմ նախազգուշական միջոց` Արտակարգ իրավիճակների, ճգնաժամերի եւ բնական աղետների ազգային գործակալությունը, ավիացիոն իշխանությունների հետ միասին, որոշում է կայացրել երկու շաբաթով հետաձգել բոլոր թռիչքներն ու տարանցումը: Այս միջոցը չի տարածվում բեռնափոխադրումների եւ տարհանման թռիչքների վրա»,- նշվում է հրապարակված հրամանի մեջ, որը ուժի մեջ կմտնի 48 ժամ անց:

ԱՄԷ-ում մինչ այժմ հայտնաբերվել է COVID-19 վարակի 153 դեպք, մահացել է երկու մարդ, 38-ը առողջացել է:

Նոր կորոնավիրուսի բռնկումը գրանցվել էր 2019-ի վերջին Կենտրոնական Չինաստանում, այնուհետեւ տարածվել էր ավելի քան 150 երկրում եւ Առողջապահության համաշխարհային կազմակերպության կողմից ճանաչվել է որպես համաճարակ: Վերջին տվյալների համաձայն՝ աշխարհում վարակվել է ավելի քան 300 հազար մարդ, գրանցվել է ավելի քան 13 հազար մահ: Ռուսաստանում գրանցվել է վարակի 367 դեպք: