Playboy-ը կմնա առանց տպագիր տարբերակի

Տղամարդկանց համար ամերիկյան Playboy ամսագիրը կդադարեցնի տպագիր տարբերակի թողարկումը: ԱՄՆ-ում պարբերականի թողարկումից հրաժարվելու մտադրության մասին հայտնել է Playboy Enterprises-ի ղեկավար Բեն Կոնը Medium պլատֆորմի իր բլոգում, փոխանցում է Lenta-ն:

Ընկերության ղեկավարի խոսքով՝ վերջին համարը կթողարկվի 2020 թվականի գարնանը: Ամսագիրը 2019 թվականից լույս էր տեսնում եռամսյակը մեկ: Կոնը պարզաբանել է, որ տպագիր տարբերակից հրաժարվելը աշխատակիցների հետ բավական երկար են քննարկել, բայց որոշման ընդունումն արագացավ կորոնավիրուսի տարածման հետ կապված ճգնաժամի պատճառով:

«Մենք կանցնենք մեր ամբողջ կոնտենտն առաջին հերթին թվային տարբերակով հրատարակելուն»,- հավելել է նա: Բիզնեսմենը նշել է, որ 2021 թվականին ընկերությունը նախատեսում է վերադառնալ տպագիր ձեւաչափին, բայց արդեն «տարբեր նոր ձեւերով»:

Playboy-ը ամսագիր է տղամարդկանց համար, որն ԱՄՆ-ում հրատարակվում է 1953 թվականից եւ հիմնադրվել է Հյու Հեֆների կողմից: Տարբեր տարիների պարբերականի շապիկին հայտնվել են Մերիլին Մոնրոն, Սինդի Քրոուֆորդը, Պամելա Անդերսոնը: Առաջին համարը թողարկվել է 1953 թվականի դեկտեմբերին՝ 51 հազար տպաքանակով: Ներկայումս Playboy-ը տարբեր լեզուներով թողարկվում է ամբողջ աշխարհում: Բրենդի հիմնադիր Հեֆները մահացել է 2017 թվականի սեպտեմբերին: