«Լրագրողներ առանց սահմանների» միջազգային կազմակերպությունը մտահոգված է ԶԼՄ-ների աշխատանքի սահմանափակմամբ

«Լրագրողներ առանց սահմանների» միջազգային իրավապաշտպան կազմակերպությունն աշխարհում կորոնավիրուսի համավարակի ֆոնին մտահոգություն է հայտնել Հայաստանում հայտարարված արտակարգ դրության պայմաններում լրատվամիջոցների՝ միայն պաշտոնական աղբյուրներից օգտվելու որոշման վերաբերյալ:

«Տեղեկության վերահսկումը չի օգնում համավարակի դեմ պայքարում, սական շշուկներ և վախ է տարածում»,-ասված է կազմակերպության թվիթերյան էջում:

Ինչպես ավելի վաղ հայտնել է Tert.am-ը, այս պահին ՀՀ-ում կա կորոնավիրուսի ևս 6 հաստատված դեպք, ընդհանուր թիվը՝ 84: Այս մասին ֆեյսբուքյան ուղիղ եթերի ընթացքում հայտարարել է ՀՀ վարչապտ Նիկոլ Փաշինյանը:

Ավելի վաղ ՀՀ կառավարությունն ընդունել է ՀՀ-ում մարտի 16-ի ժամը 18:30-ից մինչև ապրիլի 14-ը արտակարգ դրություն սահմանելու մասին նախագիծը:

Ամբողջ աշխարհում նոր տեսակի կորոնավիրուսով վարակման դեպքերի ընդհանուր քանակը մոտենում է 200 000-ի: Ներկայում ախտահարվածների ընդհանուր քանակը 197 000 է, ինչ վերաբերում է վարակի զոհերին, ապա թիվը հասել է 7529-ի: Ընդհանուր առմամբ, առողջացել է 81 000 մարդ:

Համաճարակի օջախ Չինաստանի սահմաններից դուրս վարակը տարածվել է 159 երկրում, աշխարհի բոլոր մայրցամաքներում: Իրավիճակն առավել ծանր է Իտալիայում, Իրանում, Հարավային Կորեայում: