Պուտինն ուզում է, որ Ռուսաստանում ընդդիմություն լինի

ՌԴ նախագահ Վլադիմիր Պուտինն անկեղծորեն կարծում է, որ երկրին ընդդիմություն պետք է: Այս մասին նա ասել է ТАСС լրատվական գործակալությանը տված «20 հարց Վլադիմիր Պուտինին» հարցազրույցում:

Լրագրող Անդրեյ Վանդենկոն հայտարարել է, որ Ռուսաստանում ընդդիմությունը խամաճիկային է եւ կերակրվում է իշխանության ափի միջից: Պուտինը շեշտել է, որ դա իրականությանը չի համապատասխանում: Նա ասել է, թե Ռուսաստանում գոյություն ունի չորս խորհրդարանական խմբակցություն, որոնք հաճախ այս կամ այն հարցի վերաբերյալ ունենում են տարբեր մոտեցումներ եւ կարծիքներ: Բացի այդ, երկրում գոյություն ունի մոտ հիսուն կուսակցություն:

«Երկրին անհրաժեշտ է ինչպես համակարգային, այնպես էլ արտահամակարգային ընդդիմություն»,- ավելացրել է նախագահը:

Հարցին, թե արտահամակարգային ընդդիմությունը արդյոք պետության թշնամի է, Պուտինը բացասական պատասխան է տվել: «Ոչ մի դեպքում: Որտեղից դա վերցրիք»,- ասել է նա լրագրող Վանդենկոյին եւ ավելացրել. «Դուք այդպե՞ս եք ուզում մտածել: Դա այդպես չէ: Դա իրականությանը չի համապատասխանում»:

Top-News.am