Պարտադիր չի մարդուն ձերբակալեն ուղարկեն Կոլիմա, որ ասենք՝ քաղաքական բանտարկյալ է. Հարություն Հարությունյան

Պարտադիր չի մարդուն ձերբակալեն ուղարկեն Կոլիմա, որ ասենք՝ քաղաքական բանտարկյալ է: Այս մասին, այսօր՝ մարտի 16-ին, լրագրողների հետ հանդիպման ժամանակ նշեց «5-րդ ալիքի» տնօրեն Հարություն Հարությունյանը՝ անդրադառնալով «5-րդ ալիքի» սեփականատեր Արմեն Թավադյանի նկատմամբ հարուցված քրեական գործին:

«Մենք հենց սկզբից ասել ենք, որ Արմեն Թավադյանին կալանավորել են երկու պատճառով. առաջինը, որ Ռոբերտ Քոչարյանի ընկերն է, իսկ Ռոբերտ Քոչարյանը միանշանակ քաղաքական գործով է գնում, քաղկալանավոր է: Երկրորդը՝ ճնշելու, դժվարացնելու, խանգարելու «5-րդ ալիքի» աշխատանքները: Շատ վստահ էի, որ դրանք են պատճառները, եւ հիմա էլ ուրախ եմ, որ իմ մասկածները հաստատվեց, այստեղ երկրորդ կարծիք լինել չի կարող»,-ասաց նա:

Իր հերթին Թավադյանի պաշտպան Հովհաննես Խուդոյանը նշեց. «Թյուր ընկալում կա, որ քաղաքական հետապնդում կարող է իրականացնել միայն այն անձանց նկատմամբ, որոնք զբաղվում են ակտիվ քաղաքական գործունեությամբ: Քաղաքական հետապնդման ենթակա կարող է լինել ցանկացած անձ, ում նկատմամբ հետապնդումը կարող է ինչ-որ չափով օգնել որոշակի քաղաքական գործընթացների: Օրինակ, եթե որեւէ անձի քրեական հետապնդումը նույն իշխանություններին կարող է քաղաքական դիվիդենտներ բերել, անկախ նրանից՝ այդ անձը քաղաքականությամբ զբաղվել է, թե ուղղակի ինչ-որ խմբի ներկայացուցիչ է, որի նկատմամբ որոշակի քաղաքականություն կա»: