Գրենլանդիայի եւ Անտարկտիկայի սառույցները հալչում են 6 անգամ ավելի արագ, քան 30 տարի առաջ

Սառույցների հալման արդյունքում ծովի մակարդակի աճը գլոբալ տաքացման ամենակործանիչ հետեւանքներից մեկն է: Այդ գործընթացքում ամենամեծ ներդրումն ունեն Գրենլանդիան եւ Անտարկտիկան: Եվ ինչպես ցույց է տալիս նոր հետազոտությունը, այդ շրջաններում սառույցների հալման պրոցեսն արագանում է, հաղորդում է HighTech+-ը՝ հղում անելով Guardian-ին:

50 կազմակերպություններից գիտնականների միջազգային խումբը հայտնաբերել է, որ 2010-ական թվականներին Գրենլանդիան եւ Անտարկտիկան ամեն տարի միջինում կորցրել են 475 մլրդ տոննա սառույց: Դա 6 անգամ ավելի շատ է, քան 1990-ական թվականներին, երբ ամեն տարի կորուստը կազմել է 81 մլրդ տոննա:

Դա կապված է եղել օվկիանոսների ջերմաստիճանի աճի հետ: Արդյունքում սառույցներն ավելի արագ են թափվում ծովն ու դրանից ավելի շատ սառցաբեկորներ են առաջանում: Գրենլանդիայի սառույցների կորստի մի մասն էլ կապված է օդի ջերմաստիճանի բարձրացման եւ սառույցների մակերեսի հալման հետ:

Հետազոտության հեղինակները նշում են, որ հալման արագությունը նշանակում է օվկիանոսների մակարդակի հավելյալ աճ: Փորձագետների խոսքով՝ մինչեւ 2100 թվականը օվկիանոսների մակարդակը կարող է հասնել միջինում 53 սմ-ի: Սակայն նոր հետազոտության տվյալները այդ թվին ավելացնում են եւս 17 սմ: Դա նշանակում է, որ ռիսկի գոտում ավելի մեծ թվով մարդիկ կհայտնվեն:

Աղետալի հետեւանքներից խուսափելու համար անհրաժեշտ է հնարավորինս արագ միջոցներ ձեռնարկել ջերմոցային գազերի արտանետումները նվազեցնելու համար: