Թուրքիան պետք է դադարի խափանել միգրացիոն ճգնաժամի կարգավորման հնարավորությունները

Թուրքիան պետք է հավատարիմ մնա իր վերջերս «հստակ» դիրքորոշմանը եւ դադարի խափանել շարունակվող միգրացիոն ճգնաժամի կարգավորման հնարավորությունները՝ սպառնալով բաց պահել սահմանները միգրանտների համար։ Այս մասին հայտարարել է ԵՄ մամուլի քարտուղար Պիտեր Ստանոն։

«Երկուշաբթի օրը Բրյուսելում բարձր մակարդակով ձեռք էր բերվել հստակ համաձայնություն այն մասին, որ ԵՄ-ն եւ Թուրքիան համատեղ կաշխատեն ընթացիկ իրավիճակի լուծման ուղղութամբ»,- հունական MEGA հեռուսաալիքին տված հարցազրույցում ասել է Ստանոն։

«Գործողությունները եւ հայտարարությունները, որոնք չեն համապատասխանում այդ պարտավորությանը, հակաարդյունավետ են եւ խափանում են համատեղ լուծում գտնելու հնարավորությունները։ Դեպի առաջ միակ ուղին համատեղ աշխատանքն է»,- հավելել է նա։

Երկուշաբթի օրը Թուրքիայի նախագահ Ռեփեփ Թայիփ Էրդողանի, ԵՄ խորհրդի նախագահ Չարլզ Միշելի եւ Եվրոպական հանձնաժողովի նախագահ Ուրսուլա ֆոն դեր Լեյենի հանդիպումից հետո Բրյուսելն ակնկալում էր, որ Անկարան կթուլացնի ճնշումը հույն-թուրքական սահմանին։

Սակայն Բրյուսելը հասկացրել էր, որ «կառուցողական փոխգործակցությունը» նախապայման է ընթացիկ իրավիճակի ցանկացած լուծման համար, եւ խնդրել էր Թուրքիային նվազեցնել ճնշումը Հունաստանի հետ սահմանին, որը նույնպես ԵՄ արտաքին սահման է։

Սակայն նախօրեին Թուրքիայի նախագահը եւս մեկ անգամ հայտարարել էր, որ բաց կպահի սահմանը փախստականների համար, որոնք փորձում են հասնել Եվրոպա, մինչեւ ԵՄ-ն չկատարի իր բոլոր պահանջները։