Ինչ դավադրության արդյունքում է Թավադյանն ազատ արձակվել. Փաշինյանը ներկայացրել է իր «ռեակցիան»

Այսօր «այո»-ի քարոզարշավի ժամանակ ՀՀ վարչապետ Նիկոլ Փաշինյանն անդրադարձել է «5-րդ ալիք» հեռուստաընկերության սեփականատեր Արմեն Թավադյանի խափանման միջոցը փոխելու եւ կալանավորումը վերացնելու մասին վերաքննիչ քրեական դատարանի մարտի 11-ի որոշմանը՝ նշելով, որ դրանից հետո քաղաքացիները նորից Կառավարությանը սկսել են քննադատել։

«Քննադատում են, ասում են բա կառավարությունը կու՞յր էր, չէ՞ր տեսնում, որ գործն այն դատավորի մոտ է, ով հրապարակային հայտարարություններ է արել ի պաշտպանություն Ռոբերտ Քոչարյանի և նրանց քաղաքական թիմի։ Բայց մեզ ի՞նչ դատական համակարգ է պետք, մենք պետք է այնպիսի դատական համակարգ, որն եթե մարդուն ազատի, կասենք եթե դատարանն ազատել է, ուրեմն նման հիմքեր է ունեցել»,-ասել է Փաշինյանն ու ավելացրեց՝ չի ասում, թե դատարանն ազատման հիմքեր չի ունեցել, սակայն առաջին ռեակցիան այն է, թե ինչ դավադրության արդյունքում այդ ամենը տեղի ունեցավ։

Վարչապետի խոսքով, դատական համակարգը սկսած ՍԴ-ից, վերջացրած վերաքննիչ և առաջին ատյանի դատարաններով երբեմն ակնհայտորեն ու բացահայտորեն ներգրավված է եղել քաղաքական պրոցեսներում։

«Ոնց որ այն կինոյի մեջ է ասում՝ մուզիկանտ չզբաղվել պոլիտիկա, հիմա էլ մենք ենք ասում` Հրայր Թովմասյան չզբաղվել պոլիտիկա։ Եթե ուզում է զբաղվի պոլիտիկա, թող ազատի Սահմանադրական դատարանի նախագահի աշխատասենյակը, թող գա, Ջերմուկում ձեր առջև կանգնի, ինչքան ուզում է քաղաքականությամբ զբաղվի։ Ինչ է նշանակում դատավորը լինի Քոչարյանի կողմնակից, Փաշինյանի կողմնակից, Պողոսյանի կողմնակից...դա աբսուրդ է։ Եթե որևէ մեկը մեկ ուրիշի կողմնակիցն է, նա կարող է ամեն ինչ լինել, բացի դատավորից, և մենք հիմա վստահաբար այդ պրոցեսը կտանենք ու թացը չորից կտարբերակենք»,-ասել է Փաշինյանը։

Խոսելով ՍԴ-ի մասին՝ նա նշել է, որ դատավարները մշտապես «փաթեթավորել են» իշխանության որոշումները. «Այդ իշխանությունը գնացել է, իրենց հաճախորդը հեռացել է, իրենք էլ պետք է հեռանան, որովետև մենք որոշումներ փաթեթավորելու կարիք չունենք։ Մեր որոշումներն ուղիղ են, մենք խոսում ենք ուղիղ՝ մարդկանց աչքերի մեջ նայելով։ Սխալվում էլ ենք, վիճում էլ ենք, բայց այդպիսին ենք»։