Համաշխարհային տնտեսության անկման պատճառը գերտերությունների մրցակցությունն է եւ կորոնավիրուսը. տնտեսագետ

Համաշխարհային տնտեսության անկման պատճառը գերտերությունների միջեւ մրցակցությունն է: Փաստացի նրանց միջեւ տնտեսական պատերազմ է ընթանում: Այս մասին մարտի 11-ին լրագրողների հետ հանդիպման ժամանակ ասաց ՀՅԴ անդամ Սուրեն Փարսյանը:

Նա նշեց, որ համաշխարհային տնտեսության աճի տեմպերն ընդհանուր առմամբ ընկել են: «Երկրորդ պատճառը կորոնավիրուսն է, որը շատ ուժգին հարված է հասցրել Չինաստանի տնտեսությանը: Անկումը կազմել է 1-ից մինչեւ 2 տոկոս, ինչն ուղղակի աննախադեպ է»,- ասաց Փարսյանը՝ պարզաբանելով, որ Չինաստանը համաշխարհային տնտեսության հիմնական խաղացողներից մեկն է, որի բաժինը դրա մեջ չափազանց մեծ է:

Փորձագետի կարծիքով՝ Հայաստանի համար ամենամեծ մտահոգությունը հարուցում են Իրանն ու Իտալիան: Իտալիայում իրավիճակը լրջորեն անհանգստացնում է նաեւ ԵՄ անդամ երկրներին, որոնց հետ Հայաստանն ակտիվորեն համագործակցում է: Դրանից բացի, փորձագետի խոսքով, կորոնավիրուսը լրջագույն հարված է հասցնում տրանսպորտի, բեռնափոխադրումների, նավթամթերքների իրացման ոլորտներին, ինչն անպայման կանդրադառնա շուկայում գնագոյացման վրա: