Ես գործից ազատման դիմում չեմ գրել, վաղն էլ աշխատանքի եմ գնալու. Սմբատ Գոգյան

Բարձրագույն որակավորման կոմիտեի նախագահ Սմբատ Գոգյանը հերքում է իրեն աշխատանքից ազատելու մասին լուրը: NEWS.am-ի հետ զրույցում նա ասաց, որ ինքը աշխատանքից ազատվելու դիմում չի գրել, վաղն էլ պատրաստվում է սովորականի պես աշխատանքի գնալ:

Նա չցանկացավ անդրադառնալ հարցին, թե արդյոք իր եւ ԿԳՍՄ նախարարի միջեւ կոնֆլիկտ եղել է, թե` ոչ:

«Ես գործից ազատման դիմում չեմ գրել, ինձ աշխատանքից ազատում է ոչ թե նախարարը, այլ վարչապետը, վարչապետն էլ դեռ նման որոշում չունի: Վաղը ես աշխատանքի եմ գնալու: Կհասկանամ ինչ նյութ էր, խոսքն ինչի մասին էր, եւ օրվա ընթացքում պարզաբանումներ կլինեն»,- ասաց նա:

Նշենք, որ Hraparak.am կայքի տեղեկություններով՝ Բարձրագույն որակավորման կոմիտեի նախագահ Սմբատ Գոգյանն առաջիկայում հրաժեշտ կտա իր պաշտոնին։ Նա, ըստ աղբյուրի, աշխատանքային խնդիրներ ունի սուպերնախարար Արայիկ Հարությունյանի հետ, մասնավորապես՝ Գոգյանը հրաժարվում է կատարել նրա խնդրահարույց ցուցումները։