Մարգարիտա Սիմոնյանը հայտնել է, որ անհայտ անձինք Անկարայում հարձակվել են Sputnik Թուրքիայի աշխատակիցների վրա

 Ռուսական RT հեռուստաալիքի և «Ռուսաստանն այսօր» գործակալության գլխավոր խմբագիր Մարգարիտա Սիմոնյանը հայտարարել է, որ անհայտ անձինք Անկարայում հարձակվել են Sputnik Թուրքիայի աշխատակիցների վրա՝ նրանց մեղադրելով հայրենիքին դավաճանելու մեջ: Sputnik Թուրքիա կայքը ևս մանրամասներ է ներկայացրել միջադեպի վերաբերյալ: Փոխանցում է РИА Новости-ն:

«Փոտրվարի 29-ին, Մոսկվայի ժամանակով 22:30-23:00-ի սահմաններում, անհայտ անձինք Անկարայում փորձել են կոտրել մեր երեք աշխատակիցների բնակարանների դռներն ու ներս մտնել: Նրանք վանկարկել են տարբեր կարգախոսներ և վիրավորական արտահայտություններ: Աշխատակիցներն այժմ ցուցմունք են տալիս ոստիկանությունում: Նրանք պատմել են, որ հարձակվողներից յուրաքանչյուրի խմբում եղել է շուրջ 10 մարդ»,- տեղեկացրել է Sputnik Թուրքիա կայքը:

Նշվում է, որ չարագործները վանկարկել են՝ «Թուրքիան թուրքերի համար է», «Ռուս լրտեսներ, «Նահատակներն անմահ են, հայրենիքը չի բաժանվում» և այլ կարգախոսներ: Աղբյուրը հայտնում է, որ նրանք հասցրել են փախչել մինչ ոստիկանների ժամանելը: Միջադեպի հետևանքով տուժողներ չկան: