Եթե երկրի քաղաքական վերնախավը կրավորական դիրք բռնի, Փաշինյանին մեղադրել չենք կարող. Երվանդ Բոզոյան
Իշխանությունը սահմանադրական հանրաքվեի միջոցով իր համար շատ տրամաբանական խնդիր է փորձում լուծել՝ մարդկանց մոտ արթնացնել 2 տարի առաջ եղած էյֆորիան։ «Փաստինֆո»-ի հետ զրույցում նման կարծիք է հայտնել քաղաքագետ Երվանդ Բոզոյանը՝ անդրադառնալով սպասվող սահմանադրական հանրաքվեին, որի անցկացումը իրավական հանրույթը հակասահմանադրական է համարում։
«Եթե 2 տարի առաջ նա այդկերպ գալիս էր իշխանության, ապա այսօր նա հանրաքվեի է գնում, որպեսզի հաստատի իր բացարձակ իշխանությունը»,-կարծում է Երվանդ Բոզոյանը։
Քաղաքագետի խոսքով, նախկինում եղած էյֆորիան հասարակության շրջանում այսօր , իհարկե, գոյություն չունի եւ ծիծաղելի կլինի, եթե հանրությունը գնա եւ «այո» ասի այդ հանրաքվեին
«Եթե երկրում կա վերնախավ, որը գիտակցում է, թե ինչ է փորձում անել իշխանությունը այդ հանրաքվեի միջոցով, պետք է կարողանա կոնսոլիդացնել հասարակությանը եւ բացատրի, թե իրականում ինչ է կատարվում։ Եթե այդ վերնախավը պասիվ, կրավորական դիրք պետք է ունենա, այսպես ասած դիտորդի կարգավիճակում մնա, բնականաբար, ժողովուրդը կուղղորդվի մեկ կենտրոնից եւ Նիկոլ Փաշինյանը կհաստատի բացարձակ իշխանություն։ Այդ դեպքում մեղադրել նրան դրա համար չի կարելի, որովհետեւ , եթե կա վերնախավ, որը գիտակցում է դա եւ կրավորական դիրքորոշում է որդեգրում, ուրեմն ինքը դառնում է հանցավոր վերնախավ»,-ասաց Երվանդ Բոզոյանը։
Քաղաքագետի կարծիքով, այս սցենարի պարագայում մեծ տարբերություն լինել չի կարող Նիկոլ Փաշինյանի եւ այդ վերնախավի միջեւ, եթե մեկը ուզում է բացարձակ իշխանություն հաստատել, իսկ մյուսը գիտի այդ մասին, բայց դա կանխելու ուղղությամբ որեւէ քայլ չի ձեռնարկում։
«Դա կախված է ոչ միայն խորհրդարանական ու արտախորհրդարանական ուժերից, այլեւ հասարակությունից, նույնիսկ այն մարդկանցից, ովքեր Փաշինյանի կողմնակից են, բայց չեն ընդունում, որ նա բացարձակ իշխանություն հաստատի, որովհետեւ աշխարհի որեւէ երկրում այդպիսի բն գոյացություն չունի, դա կար կոմունիստների ժամանակ, բռնատիրական ռեժիմների ժամանակ»,-շեշտեց քաղաքագետը՝ հավելելով, որ այս ամենը քաղաքական ու հասարակական վերնախավը պետք է բացատրի ժողովրդին։
«Եթե ժողովրդին որեւէ մեկը չկողմնորոշի, իշխանությունը իր պարզունակ հեղափոխական մեթոդներով դա կանի, բայց դրանից կտուժի երկիրը, իսկ այդ ամենի գլխավոր պատասխանատուն կլինի ոչ միայն Նիկոլ Փաշինյանը, այլեւ այն վերնախավը, որը չի կարողացել կամ չի ցանկացել դա անել»։
Երվանդ Բոզոյանն ասաց, որ սպասվելիք հանրաքվեի քարոզարշավը լինելու է ստանդարտ նախընտրական քարոզարշավների նման ՝ իշխանությունը ունի իշխանություն եւ գործադիր համակարգ եւ փորձելու է քարոզարշավը կենտրոնացված ձեւով անցկացնել։
Երվանդ Բոզոյանը մանիպուլյացիա անվանեց իշխանական թեւից եկող այն ազդակները, թե սահմանադրական հանրաքվեով հեղափոխությունը հասցվելու է իր ավարտին եւ շատ մարդիկ այդ խայծը կուլ են տալիս։
«Իրականում դա հեղափոխություն չէ, դա հակահեղափոխական քայլ է , եթե մենք նորից շարժվենք հեղափոխականների եւ հակահեղափոխականների տրամաբանության մեջ,մենք նորից կհայտնվենք այդ մանիպուլյացիայի մեջ։ Պետք է մարդկանց բացատրել, որ այդ հանրաքվեն որեւէ կապ չունի հեղափոխության հետ։ Աշխարհում ոչ մի բռնապետ չի գալիս եւ ասում՝ ես գալիս եմ ձեզ բռնանալու։ Նույն Ստալինը հայտարարում էր, որ ինքը գալիս է երջանկացնելու ամբողջ մարդկությանը, նույնը անում էր Լենինը։ Ժողովրդին պետք է դա բացատրել եւ ժողովուրդը պետք է պատասխանի՝ պատրա՞ստ է նրան, որ ամբողջ իշխանությունը հանձնի մեկ մարդու, թե ոչ։ Ի վերջո,այդ հոտային մտածողության ժամանակներն անցել են»,-ընդգծեց Երվանդ Բոզոյանը։
Քաղաքագետը նաեւ նկատեց՝ իր շահի տեսանկյունից ելնելով, իշխանությունը գուցե ճիշտ է անում։ Փաշինյանը նպատակ է դրել եւ ուզում է հասնել այդ նպատակին, ուստի գլխավոր խնդիրն այն է, թե պատրա՞ստ է արդյոք քաղաքական վերնախավը համախմբվել եւ հասարակությանը իրական նպատակը տեղ հասցնել։
«Պարզ է , որ Փաշինյանը պետք է համերգների էլ մասնակցի, ոտանավորներ էլ գրի, հեծանիվով ֆռֆռա....նորմալ երեւույթ է, մարդն իր նախընտրական արշավով է զբաղված, մեղադրելու չէ։ մեղադրել պետք է նրանց, ովքեր այս ամենը գիտակցելով հակառակը չանեն»,-եզրափակեց Երվանդ Բոզոյանը։
Հունիսի 7-ը Մեր 2-րդ Անկախության Հանրաքվեն Է
Աննա Ամրոյանը ոսկե մեդալ է նվաճել ծանրամարտի Եվրոպայի առաջնության հրում վարժությունում
Թրամփի հետ ընթրիքին հնարավոր է եղել մասնակցել առանց ստուգումներ անցնելու WSJ
Աջափնյակում ընթանում են նոր՝ «Արև Արենա» կենտրոնի բացօթյա համերգասրահի ստեղծման աշխատանքները
Մեր նպատակն է, որ ՀՀ սահմանի բոլոր հատվածները լինեն սահմանապահ զորքերի պատասխանատվության ներքո
Այսօրվանից սկսած սպառման համակարգը բաշխման ցանցին միացման նոր դիմում ներկայացնելիս կգործեն արդեն նվա...
Մենք գլուխ ենք խոնարհում զոհերի հիշատակի առջև և մեր համերաշխությունն ենք հայտնում հայ ժողովրդին. Չեխ...
Առողջապահության նախարարն այցելել է Շիրակի մարզի՝ վերանորոգված և բուժսարքավորումներով հագեցած պոլիկլի...
Պարի միջազգային օր․ Երևանի կենտրոնում կանցկացվի «Արի՛, պարի՛» խորագրով միջոցառումների շարք․ միացե՛ք ...
Հեռուստատեսային ալիքների հեռարձակումը ժամանակավորապես կդադարեցվի