Այդ մարդու հայտնվելը եղել է պայմանավորված. Լեւոն Քոչարյանը՝ հայտնի տեսանյութի մասին

Ռոբերտ Քոչարյանի աջակիցներից մեկի մասնակցությամբ միջադեպը Ռոբերտ Քոչարյանի որդին երկու կողմից է դիտարկում։

«Ինչ-որ հատուկ նպատակով էդ մարդուն ուղարկել են, ձայնագրել են այդ ամեն ինչը, երկրորդ, որ մի քիչ վատ տարբերակ է, չեմ ուզում մտածել դա, որ, ի սկզբանե, այդ մարդու հայտնվելը եղել է պայմանավորված, ոչինչ էլ պետք չէ բացառել՝ հաշվի առնելով իշխանութույունների գործելաոճը», - լրագրողների հետ զրույցում ասաց Լևոն Քոչարյանը։

Նա նշեց, թե երկու տարի է՝ պնդում են, որ իրենք երբևիցե նպատակ չունեն գործին խոչընդոտելու, ինչ-որ ցուցմունք չկա գործի մեջ, որը կուզեին, որ փոխվեր։

«Միակ անհամաձայնությունը ցուցմունքերի հետ, հայրս էլ ասել է, Արշակ Կարապետյանի մի նախադասությունն է, ուրիշ ցուցմունք անհասկանալի է, թե ինչ ձևով պիտի փոխվի, կամ ինչ ձևով պետք է մեզ վնասի, չկա գործում նման բան, աբսուրդ է, որ նման բան անի մի մարդ, որին ճանաչում ենք երեք ամիս», - ասաց նա։

Հարցին՝ ինչո՞ւ է դա արվել երեկ, Քոչարյանի որդին արձագանքեց՝ որ դա ազդի դատարանի այսօրվա որոշման վրա։

Լևոն Քոչարյանի խոսքով՝ ինքն անձամբ ճանաչում է տեսանյութի մարդուն ու ինչ-որ մարդիկ կան իր հոր աջակիցների մեջ, որ անտեղի խոստումներ են տվել, իրենց սխալ են պահել։

«Էդ մարդկանց ասել ենք, որ պետք չի գալ-գնալ», - ասաց Լ. Քոչարյանը։

«Իշխանությունները հորս ամեն միջոցով կալանքի տակ են պահում ու ճնշում են գործադրում դատարանների վրա, դա միանշանակ է»-ասաց նա։

Հիշեցնենք, որ այսօր Վերաքննիչ դատարանը՝ նախագահությամբ Լուսինե Աբգարյանի, մերժեց ՀՀ երկրորդ նախագահ Ռոբերտ Քոչարյանի պաշտպանների՝ գրավի դիմաց իրենց պաշտպանյալին ազատելու միջնորդությունը։

Նշենք, որ երեկ համացանցում տեսանյութ էր տարածվել, ըստ որի՝ Ռոբերտ Քոչարյանի աջակիցը մարտի 1-ի գործով տուժողին ցուցմունքից հրաժարվելու առաջարկ է արել։