Այսպիսին պետք է լինի ՀՀ իշխանությունների ուղերձը մամուլի ազատության օրվա կապակցությամբ

Կարծում ենք, որ ՀՀ իշխանությունների ուղերձը մամուլի ազատության օրվա կապակցությամբ հենց այսպիսին պետք է լիներ: Այսպես ավելի ազնիվ եւ արդար կլիներ.

«Լրատվամիջոցների հարգելի ներկայացուցիչներ,

շնորհավորում եմ Մամուլի ազատության համաշխարհային օրվա առթիվ:

Ազատությունն ու մշակույթն այն երեւույթներն են, որոնք անհնար է չափել եւ որոնք անհրաժեշտ են յուրաքանչյուր երկրի ու ժողովրդի, յուրաքանչյուր պետության ու հասարակության համար, բայց ոչ Հայաստանի եւ հայ ժողովրդի, մեր հասարակության համար: Լրատվական դաշտում ազատությունն ու մշակույթը գոյություն ունեն ոչ թե զուգահեռ, այլ միախառնված վիճակում, բայց դա քաղաքակիրթ աշխարհում, իսկ մեզ մոտ լրատվական դաշտում ազատությունը խիստ անընդունելի է, իսկ անկախ մամուլը մեր պետության թշնամին է: Պատահական չէ, որ մենք ամեն ինչ արել ենք, որ Հայաստանում մամուլը ոչ ազատ, ոչ էլ անկախ լինի: Հիշեք Սարի թաղի դեպքերի ժամանակ ինչպես մի լավ ջարդ տվեցինք այն լրագրողներին, ովքեր մի պահ, գուցե մի քանի տասնորդական վայրկյան մոռացել էին, որ Հայաստանում անկախ լրատվամիջոց, ազատ լրատվամիջոց չի կարող լինել: Միեւնույն ժամանակ, ազատ խոսքը զենքով ու բռնությամբ ճնշելը նույնչափ ընդունելի ու թույլատրելի է, որչափ թշնամու դիրքերի ճնշումը: 

Ավելի քան քառորդ դար ձեր՝ լրագրողներիդ ստեղծագործական միտքն ու խոսքը կարող էին ազատ լինել պարտադրանքից, բայց մեր երկրում մեզ նման շռայլություն չենք կարող թույլ տալ: Մենք ամեն ինչ անում ենք, որ մեր մամուլը վերածվի մուտիլովկաների դաշտի, ստի տարածման հարթակի: Որքան լկտի լինի սուտը, այնքան այն ավելի լավ կտարածվի: Իսկ սուտը մեզ պետք է, անհրաժեշտ օդի եւ ջրի նման: Նման իշխանությունների հենքը սուտն ու կեղծիքն է, հետեւաբար նաեւ ստի վրա հենված մամուլը: Հենց այսպիսի մթնոլորտում էլ ծնվում է այն լրատվությունը, որն աջակցում ու ծառայում է հիվանդ հասարակությանը եւ պսեվդոքաղաքական դաշտին, ուժեղ իշխանությանը եւ աղքատ ու կաշառվող ընտրազանգվածին: 

Մամուլը գոյություն ունի ոչ թե սիրվելու համար, այլ որպեսզի գործիք լինի այս կամ այն գործչին պախարակելու, նրա վրա ճնշում գործադրելու համար: Մենք հիանում ենք այն լրատվական դաշտով, որը ստեղծել ենք: Դիտեք հայկական հեռուստաալիքները, եւ ձեր միտքը ավելի կբթանա եւ այլեւս չեք մտածի ոչ խնդիրների, ոչ էլ ծանր սոցիալական վիճակի մասին: Կարդացեք մամուլը, եթե դեռ կարողանում եք կարդալ եւ կսուզվեք մուտիլովկաների անսահման տարածքում:

Եւս մեկ անգամ շնորհավորելով Մամուլի ազատության համաշխարհային օրվա առթիվ՝ հավաստիացնում ենք, որ ամեն ինչ կանենք, որ մի երկու դուրսպրծուկ ազատ մամուլի մնացուկները արմատախիլ լինեն մեր միջից»:

Top-News.am 

Այս թեմայով Թքած, թե երկիրը դատարկվում է, կարեւորը դիտումների քանակն է