Սեյրան Օհանյանը հստակ պատասխան տվեց բազմաթիվ հարցերի

Պաշտպանության նախկին նախարար Սեյրան Օհանյանը հերթական անգամ անդրադարձել է մարտի 1-ի իրադարձություններին եւ շեշտել, որ ոչ մինչեւ մարտի 1-ի ողբերգությունը, ոչ դրանից հետո բանակը ժողովրդի հետ որեւէ բախման չի մտել:

Սեյրան Օհանյանը տվեց բազմաթիվ հարցերի պատասխաններ, ընդ որում՝ տվեց շատ հստակ, պարզ եւ բոլոր նրանք, ովքեր իսկապես ուզում են հասկանալ, թե իրականում ինչ դերակատարում է ունեցել բանակը մարտի 1-ի իրադարձություններին, ինչ է իրենից ներկայացնում 0038 հրամանը՝ սպառիչ պատասխաններ կստանան:

Պաշտպանության նախկին նախարարն ունեցավ իր կենսագրության լավագույն ելույթներից մեկը: Նա ոչ միայն խոսեց բուն դեպքերից, այլ անդրադարձավ պետության համար կարեւորագույն բազմաթիվ հարցերի, տվեց շատ հստակ գնահատականներ:

«Իրավական գործընթացը կեղտ բռնելու գործընթացի մի վերածեք»,- իրավապահ համակարգին կոչով դիմեց Սեյրան Օհանյանը: Նա անընդունելի է համարում այն գործելաոճը, որը ՀՔԾ-ն կիրառում է ՀՀ երկրորդ նախագահ Ռոբերտ Քոչարյանի, պաշտպանության նախկին նախարար Միքայել Հարությունյանի եւ ՀԱՊԿ արդեն նախկին գլխավոր քարտուղար Յուրի Խաչատուրովի նկատմամբ:

Մանրակրկտորեն խոսելով մարտի 1-ին բանակի գործողությունների մասին, Սեյրան Օհանյանը հստակ շեշտեց, որ զինված ուժերը գործել են օրենքի սահմաններում, հենվելով նախագահի կողմից ստորագրված արտակարգ դրության մասին հրամանագրի, Սահմանադրության այն մասի, որը հստակ սահմանում է, որ զինված ուժերը երկրի անվտանգության երախավորն են, ինչպես նաեւ կայազորային եւ պահակային ծառայության կանոնագրքերի հիման վրա:

Եւ որ ամենակարեւորն է, բանակի եւ ժողովրդի միջեւ որեւէ բախում չի եղել: 

Անդրադառնալով 0038 հրամանի մասին, Սեյրան Օհանյանը նկատեց, որ եթե այն իր մեջ հակաօրինական տարրեր պարունակեր, ապա շատերի վստահությունը վայելող փաստահավաք խումբը կանդրադառնար այդ հրամանին, բացի այդ այն ընդհանրապես գրավոր չէր լինի, իսկ գրավոր եղածի դեպքում էլ կոչնչացվեր:

Անցնելով մարտի 2-ին իր՝ շտաբի պետ եղած ժամանակ ընթերցած հայտնի տեքստին,  Սեյրան Օհանյանն ընդգծեց, որ այն սկսվել է սիրելի հայրենակիցներ արտահայտությամբ, պահպանել կոռեկտությունը, իսկ վերջում հայտնել է շնորհակալություն:      

Եւ հասկանալի է Սեյրան Օհանյանի զարմանքը, որ քննություն իրականացնող մարմինն ամբողջ տեքստը թողած, ընտրովի, կոնտեքստից դուրս մի արտահայտություն է հանել եւ այն փորձում է օգտագործել որպես մեղադրանք:  

Պաշտպանության նախարարը շատ պարզ եւ հստակ շեշտեց, որ տեքստի նպատակը ժողովրդին եւ բանակին սադրիչներից հեռու պահելն էր:

Ուշագրավ է նաեւ Սեյրան Օհանյանի նկատառումը, որ եթե խնդիր է դրված արդարադատություն իրականացնել, ապա ինչո՞ւ են մոռացության մատնվում 1996թ. հայտնի իրադարձությունները:

Շեշտելով, որ 2008թ. մարտի 1-ի իրադարձություններին էական դերակատարում են ունեցել երկրի երեք նախագահները, Օհանյանն իր ելույթում նկատեց, որ հենց Ռոբերտ Քոչարյանին էր վերապահված ամենածանր գործը՝ այդ իրավիճակում կայունության ապահովումը, եւ հիմա նա, ինչպես նկատեց պաշտպանության նախարարը, գտնվում է անհավասար պայմաններում մյուս երկուսի նկատմամբ, ավելին՝ զրկված է ազատությունից:

Դժվար է չհամաձայնել Սեյրան Օհանյանի հետ, որ մենք, պետությունը պետք է հարգանքով վերաբերվենք երեք նախագահներին էլ, որոնց ղեկավարությամբ անկախության ենք հասել, հաղթանակներ տարել, տնտեսություն եւ երկիր զարգացրել ու անվտանգություն ապահովել:

Մեկ անգամ եւս ընդգծենք, որ Սեհրան Օհանյանը ունեցավ զինվորական, քաղաքական հասուն գործչին վայել փայլուն ելույթ, որը տալիս է բազմաթիվ հարցերի հստակ պատասխաններ: Կարճ ասած, մենք լսեցինք պետական մտածողություն ունեցող պետական գործչի ելույթ:

Top-News.am