Ստեփան Մարգարյան. Եթե որեւէ մեկը կարծում է, որ 16-ամյա պատանու ձեռքը մետաղաձողով ջարդելը դա ինչ-որ PR-ի հետ կապված է….

ՕՐՕ դաշինքի անդամ, ԱԺ պատգամավոր Ստեփան Մարգարյանը երեկ hraparak.am-ի հետ զրույցում ասաց, որ եթե նախորդ օրվա կրակոցից հետո հետեւություններ անեին, հաջորդ օրն այն ավելի ծանր շարունակություն չէր ունենա։ Ինչ վերաբերում է նրան, որ ասում են՝ միջանձնային խնդիրներ են եղել երկու կողմերի միջեւ, դրանից է ծագել վեճը, պարոն Մարգարյանն ասաց․ «Ես չգիտեմ միջանձնայինի մասին, առաջին դեպքը եղել է քարոզարշավի ժամանակ, հենց բուն քարոզարշավի պատճառով, երբ մարդկանց ասել են՝ ինչո՞ւ եք հավաքվել, ցրվեք, եւ հայհոյել են։ Հիմա էստեղ միջանձնայինը ո՞րն է դրա։ Եթե նա պրոբլեմ ուներ այդ անձանց հետ, ո՞նց էր ասում՝ ցրվեք»։

- Իշխանությունների կողմից մեսիջ եղավ, թե սա ձեռնտու էր ՕՐՕ-ի կողմնակիցներին, անգամ Աշոտյանը հայտարարեց, թե չի ցանկանում նպաստել ձեր դաշինքի վարկանիշի բարձրացմանը։

- Եթե որեւէ մեկը կարծում է, որ 16-ամյա պատանու ձեռքը մետաղաձողով ջարդելը դա ինչ-որ PR-ի հետ կապված է, ես չեմ կարող մտնել այդպիսի դիալոգի մեջ։ Եթե ավտոմատով կրակելը, մարդուն վիրավորելը, մի քանի տեղից դանակահարելը կարծում են, որ դա PR-ի խնդիր է, էս դեպքում ես ասելիք չունեմ ուղղակի։

- Դուք իշխանությունների կողմից ինչ-որ նպատակադրված քայլ տեսնո՞ւմ եք ձեր դաշինքի դեմ ուղղված։

- Ես դժվարանում եմ ասել՝ առաջին անգամն ինչ քայլ էր։ Բայց առաջին դեպքից հետո, երբ որ հետեւություն չարվեց, երկրորդ դեպքը չպիտի լիներ, հասկանո՞ւմ եք, որովհետեւ երկրորդ դեպքը ոչ թե ինչ-որ միջադեպ էր, այլ դա կազմակերպված հարձակում էր։ Երբ որ երեխայի հետեւից են ընկել, նրան ճնշել են, նա զանգել է ծնողներին, եկել են հասկանալու, թե ինչ է, գյուղապետարանից ավտոմատով, մետաղաձողերով եւ դանակներով զինված՝ դուրս են եկել մարդիկ ու կրակում են մարդու վրա ավտոմատով։ Սա արդեն միջադեպ չէ, սա կազմակերպված հարձակում է։

- Դուք տեսնո՞ւմ եք կոնկրետ միտում իշխանությունների կողմից ձեր դեմ։

- Ես տեսնում եմ առաջին դեպքից հետո հետեւություն չանելու փաստ։

- Հիմա ձեր կողմնակիցներից մարդիկ կա՞ն, որ ոստիկանությունում են։

- Ովքեր որ բերման էին ենթարկվել առաջին դեպքից հետո, բաց են թողնվել, բայց քննություն է շարունակվում։ Այս պահի դրությամբ ես չեմ տիրապետում իրավիճակին, որովհետեւ առավոտից մարզերում եմ։

Մանրամասները՝ hraparak.am-ում