Իսկ շնորհակալություն ո՞վ պետք է հայտներ

Վարչապետի պաշտոնակատար Նիկոլ Փաշինյանը մասնակցել է Չինաստանի Ժողովրդական Հանրապետության կողմից Հայաստանի Հանրապետությանը նվիրաբերված շտապ բուժօգնության 200 ավտոմեքենայի հանձնման արարողությանը:

Միջոցառմանը ներկա են եղել նաեւ ՀՀ առողջապահության նախարարի պաշտոնակատար Արսեն Թորոսյանը, Տրանսպորտի, կապի եւ տեղեկատվական տեխնոլոգիաների նախարարի պաշտոնակատար Հակոբ Արշակյանը, Հայաստանում Չինաստանի արտակարգ եւ լիազոր դեսպան Թիան Էրլունը եւ այլք:

Չինաստանի դեսպանը նշել է, որ նոր սերնդի շտապ բուժօգնության 200 ավտոմեքենաների նվիրաբերման ծրագիրը խոշորագույններից մեկն է Չինաստանի միջազգային բարեգործական նմանօրինակ ծրագրերի մեջ: 

Ի դեպ, մենք հատուկ նշեցինք, թե ովքեր են ներկա եղել միջոցառմանը: Հատուկ ենք նշել այն պատճառով, որ ընդգծենք, որ նրանցից եւ ոչ մեկը, այդ թվում եւ Նիկոլ Փաշինյանի կինը, որը եւս որոշել է մասնակցել միջոցառմանը, հարկ չեն համարել շնորհակալություն հայտնել նախորդ կառավարությանը, որն էլ չինական կողմի հետ ձեռք է բերել այս եւ մի շարք այլ պայմանավորվածություններ:

Մեղմ ասած, սա արդեն հեչ սիրուն չէ: Ավելին, նույնիսկ ամոթ է նախկին կառավարության ձեռքբերումները, հաջողությունները ներկայացնել որպես սեփականը: Տարրական բարեկրթությունը հուշում է, որ գոնե պետք էր մեկ անգամ շնորհակալություն հայտնել այն ծանր եւ դժվար բանակցությունների համար, որի շնորհիվ կամ որի արդյունքում մենք , օրինակ, ստացանք այսքան շտապ բուժօգնության 200 ավտոմեքենա:

Վարդան Մխիթարյան

Top-News.am