Հայաստանում վտանգված է խոսքի ազատությունը. տարել են «Yerevan Today» կայքի խմբագրի համակարգիչը

«Yerevan Today կայքի խմբագրությունում այսօր ստուգել են ամեն ինչ, նույնիսկ ինձ թվում է, որ 2014թ. մինչեւ այսօր մեր դրած լրատվությանը ծանոթացել են, որովհետեւ կարդացել են, լավ ինֆորմացվեցին, թե ինչ է կատարավել երկրում էդ ընթացքում»,- Ոստիկանության 6-րդ վարչության եւ ՀՀ քննչական կոմիտեի խուզարկությունից հետո լրագրողներին ասաց Yerevan today-ի խմբագիր Սեւակ Հակոբյանը:

Խմբագիրը հայտնեց, որ եկել էին ինը հոգով, որոնք ընթացքում զանգում եւ խորհրդակցում էին. «Մի մեծ համակարգ էր աշխատում, հիմա թե ինչի համար էր էդ համակարգը ուղղորդվել, էս պահին դժվարանում եմ ասել: Մենք կհասկանանք, թե ինչ է կատարվել եւ հանդես կգանք հայտարարությամբ: Ես չգիտեմ՝ ինչ են փնտրում, ինչ-որ փնտրում էին՝ չգտան, բայց տարան: Հիմա եթե պետք է ինչ-որ բան գտնեն, ուրեմն՝ կգտնեն: Գրված էր, որ մեր խմբագրությունը այդ ձայնագրությունը բոլորից շուտ է տարածել եւ ենթադրվում էր, որ մենք էլ ձայնագրել ենք, բոլորը ստուգեցին: Քանդել են դարակները, բոլոր համակարգիչները ստուգել են»,-ասաց Հակոբյանը:

Ըստ խմբագրի՝ խուզարկությունից հետո 4-5 սկավառակներ են տարել եւ խմբագրության աշխատանքը պարալիզացվել է:

Սեւակ Հակոբյանը հերքեց, որ Ռոբերտ Քոչարյանը կապ ունի կայքի հետ, նա չէ սեփականատերը. «Կայքի սեփականատերը Վարդան Հովնանյանն է, բաց ինֆորմացիա կա, կարող եք նայել, դրանից հետո թե ինչ են ասում, ինչ են անում՝ երկրորդական բան է»:

Հիշեցնենք՝ ՀՀ քննչական կոմիտեի եւ Ոստիկանության 6-րդ վարչության աշխատակիցները առավոտյան 8։30-ից սկսած խուզարկությունն իրականացնում են ԱԱԾ տնօրենի եւ ՀՔԾ պետի հեռախոսազրույցը գաղտնալսելու փաստի առթիվ հարուցված քրեական գործի շրջանակներում: