«Փյունիկը» Եվրոպայի լիգայի երրորդ փուլ մտած առաջին հայկական թիմն է

Երեւանի «Փյունիկ» ֆուտբոլային ակումբն առաջինն է հայկական թիմերից, որը հաղթահարեց Եվրոպայի լիգայի երկրորդ փուլի արգելքը եւ մտավ երրորդ փուլ:

Հայաստանյան թիմը Երեւանում 1:0 հաշվով հաղթեց ղազախստանյան «Տոբոլին», որին Կուստանայում զիջել էր 2:1 հաշվով: Երեւանում պատմական գոլը խաղի 82-րդ խփեց Մոհամեդ Կոնատեն:

Ամբողջ խաղի ընթացքում «Փյունիկը» տիրում էր առավելությանը, ունեցավ գոլ խփելու մի քանի լավ հնարավորություն, բայց միակ գոլը կարողացան խփել խաղի ավարտից ութ րոպե առաջ:

Միակ ցավալի դրվագն այն է, որ հանդիպման ամենավերջում երկրորդ դեղին քարտը ստացավ Պետրոս Ավետիսյանը եւ հեռացվեց դաշտից: Նա չի կարողանա մասնակցել երրորդ փուլի առաջին խաղին:

«Փյունիկի» մրցակիցը կլինի «Ռադնիչկի»-«Մաքաբի» Թել Ավիվ զույգի հաղթողը: Առաջին խաղն ավարտվել էր իսրայելյան թիմի հաղթանակով՝ 2:0 հաշվով:

Ընդգծենք նաեւ «Փյունիկի» գլխավոր մարզիչ Անդրեյ Տալալաեւի մեծ վաստակը այս կարեւոր հաղթանակում:

Top-News.am