Մասիսի քաղաքապետ Դավիթ Համբարձումյանին դատարանը չկալանավորեց. Նա ազատ արձակվեց

Մասիսի քաղաքապետ Դավիթ Համբարձումյանը քիչ առաջ ազատ արձակվեց Երեւանի ընդհանուր իրավասության դատարանի Կենտրոն եւ Նորք Մարաշ վարչական շրջանների նստավայրից:

Նրա փաստաբան Տիգրան Աթանեսյանը հայտարարեց, որ ձերբակալումը ճանաչվել է ապօրինի, կալանքի կիրառումը մերժվել է:

Նշենք, որ առավոտից Երեւանի ընդհանուր իրավասության դատարանի Կենտրոն եւ Նորք Մարաշ վարչական շրջանների նստավայրի դիմաց Մասիսի բնակիչները բողոքի ակցիա են անցկացնում՝ պահանջելով ազատ արձակել իրենց քաղաքապետին ու փոխքաղաքապետին:

Ավելի վաղ NEWS.am-ը հայտնել էր, որ ապրիլի 22-ին Էրեբունի վարչական շրջանում տեղի ունեցած զանգվածային անկարգությունների փաստով, ցուցարարների վրա հարձակվելու համար ձերբակալված Մասիսի քաղաքապետ Դավիթ Համբարձումյանին, քաղաքապետի տեղակալ Կարեն Օհանյանին, Մասիս քաղաքի բնակիչներ՝ 36-ամյա Սարգիս Սահակյանին, 22-ամյա Գեւորգ Համբարձումյանին, 30-ամյա Գոռ Խաչատրյանին մեղադրանք է առաջադրվել:

Եվս երկու անձ կասկածյալ է։

Դավիթ Համբարձումյանին մեղադրանք է առաջադրվել ՀՀ քրեական օրենսգրքի 225-րդ հոդվածի 1-ին 2-րդ մասերով՝ անկարգությունները կազմակերպելու եւ մասնակցելու համար: Մյուս 4 անձանց մեղադրանք է առաջադրվել ՀՀ քրեական օրենսգրքի 225-րդ հոդվածի 2-րդ մասի հատկանիշներով՝ զանգվածային անկարգություններին մասնակցելու համար։

Նշենք, որ ձերբակալվածներից երկուսի՝ Սարգիս Սահակյանի եւ Գեւորգ Համբարձումյանի նկատմամբ նախօրեին խափանման միջոց է ընտրվել ստորագրություն չհեռանալու մասին, իսկ նրանցից մեկը՝ 30-ամյա Գոռ Խաչատրյանը կալանավորվել է։

Մասիսի քաղաքապետի տեղակալ Կարեն Օհանյանի խափանման միջոցը որոշելու հարցը դատարանը կքննի այսօր ավելի ուշ:

Լուրեր Հայաստանից - NEWS.am