«Ընդդիմության առաջնորդը դարձավ վարչապետ». միջազգային մամուլն արձագանքել է Նիկոլ Փաշինյանի ընտրությանը ՀՀ վարչապետի պաշտոնում

BBC News-ը, Financial Times-ը և մի շարք այլ միջազգային հեղինակավոր լրատվամիջոցներ անդրադարձել են հայաստանյան իրադարձություններին ու այսօր Նիկոլ Փաշինյանի ընտրությանը ՀՀ վարչապետի պաշտոնում:

Նախօրեին LA Times-ը գրել է, որ շաբաթներ շարունակ Հայաստանի քաղաքացիներն «անիրական թվացող բան փորձեցին՝ խաղաղ զանգվածային ցույցերի միջոցով տապալել իշխանությունը», և երկուշաբթի երեկոյան վերադարձան Հանրապետության հրապարակ՝ այս անգամ առաջիկա հաղթանակը տոնելու համար:

BBC News-ն անդրադարձել է ընդդիմադիր գործիչ Նիկոլ Փաշինյանի հաղթանակին և նշել, որ նախօրեին հանրահայտ System of a Down ռոք խմբի անդամ Սերժ Թանկյանը նույնպես միացել է ժողովրդին:

«Ազատություն» միջազգային ռադիոկայանը, Նիկոլ Փաշինյանի հաղթանակից զատ, անդրադարձել է նաև բողոքի ցույցերի ընթացքում ներկայացված գլխարկների, շապիկների և այլ ապրանքների արտադրությանն ու տարածմանը, որոնք «աչքի են ընկնում ժողովրդական շարժման էությունն ընդգծող դիզայնով և կարգախոսներով»:

Գերմանական Deutsche Welle-ն, Süddeutsche Zeitung-ը, Zeit-ը, Bild-ը, Standard-ը և մի շարք այլ ԶԼՄ-ներ նույնպես անդրադարձել են Փաշինյանի ընտրությանը ՀՀ վարչապետի պաշտոնում՝ ներկայացնելով ԱԺ հատուկ նիստի ընթացքում այսօր անցկացված քվեարկության արդյունքները և ընդդիմության շարժման քրոնիկոնը:

Լեհական Gazeta Wyborcza-ն էլ գրում է, որ «թավշյա հեղափոխության առաջնորդն ընտրվեց ՀՀ վարչապետի պաշտոնում»։ Ըստ թերթի՝ մարդիկ զանգվածային ցույցերի միջոցով կարողացան հասնել փոփոխությունների։ «ՀՀ-ում իշխող կուսակցությունը, չդիմանալով ժողովրդի ճնշումներին, նահանջեց՝ չառաջադրելով իր թեկնածուին»,- գրում է թերթը։

Թուրքական մամուլը նույնպես ուշադրությամբ հետևում է Հայաստանում զարգացող իրադարձություններին։ Թուրքական լրատվամիջոցները հատկապես շեշտադրում են կատարել այն փաստի վրա, որ ՀՀ խորհրդարանում ձայների մեծամասնությամբ ընտրված վարչապետն ընդդիմադիր գործիչ է և Ազգային ժողովում ընդամենը 9 պատգամավորական աթոռ ունեցող ընդդիմադիր դաշինքի ղեկավար։

«Ընդդիմության առաջնորդը դարձավ վարչապետ» վերնագրով հոդվածում թուրքական demokrathaber.org կայքը պատմել է շաբաթներ շարունակ տևած ժողովրդական շարժման, քաղաքական պայքարի ու խորհդարանական երկու քվեարկությունների մասին։

«Դեռևս անցյալ շաբաթ Փաշինյանը չկարողացավ խորհրդարանում ստանալ վարչապետ ընտրվելու համար անհրաժեշտ 53 ձայնը, դրանից հետո նա իր կողմնակիցներին զանգվածային գործադուլի ու քաղաքացիական անհնազանդության կոչ հղեց, որի արդյունքում երկրում հասարակական կյանքը պարզապես կաթվածահար եղավ։ Ի վերջո, Հայաստանի իշխող «Հանրապետական կուսակցություն»-ը հայտնեց, որ վարչապետի թեկնածու չի առաջադրի, և երկրորդ քվեարկության ժամանակ աջակցեց Փաշինյանի թեկնածությանը»,- նշում է թուրքական «Անադոլու» գործակալությունը։

BBC-ի թուրքական ծառայությունն իր հերթին շեշտել է նաև ՀՀ նախկին վարչապետ Կարեն Կարապետյանի՝ երկրում տիրող քաղաքական ճգնաժամից դուրս գալու ջանքերի մասին՝ գրելով, որ վերջինս դեռևս անցյալ շաբաթ կոչ էր արել ընդդիմությանը նստել բանակցությունների սեղանի շուրջ։

«Փաշինյանը զգուշացրել էր, որ իր չընտրվելու դեպքում երկրում կսկսվի քաղաքական «ցունամի», իսկ ընտրվելու դեպքում՝ խոստացել արտահերթ խորհրդարանական ընտրություններ կազմակերպել», - գրում է թուրքական «Էվրենսել» պարբերականը։

Ադրբեջանական մամուլը հիմնականում ուշադրություն է հրավիրել այն փաստի վրա, որ Փաշինյանը, ինչպես և նախապես հայտարարել էր, վարչապետ ընտրվելուց հետո իր առաջին այցը կկատարի Արցախ։