Մարսելում արգելք է սահմանվել բոլոր հանրահավաքների և ցույցերի վրա

Բուշ-դյու-Ռոն դեպարտամենտի պրեֆեկտուրան անվտանգության նկատառումներից ելնելով արգելք է սահմանել առաջիկա շաբաթ օրը՝ հոկտեմբերի 24-ին, Մարսելում նախատեսված բոլոր հանրահավաքների և ցույցերի վրա, հայտնում է տարածաշրջանային «La Provence» պարբերականը՝ հղում անելով դեպարտամենտի պրեֆեկտ Ժակ Վիտկովսկու պաշտոնական հայտարարությանը։

Արգելքը տարածվում է ինչպես նախապես իրազեկված, այնպես էլ ինքնաբուխ կազմակերպվող բոլոր հավաքների վրա՝ անկախ դրանց բնույթից կամ բարձրացվող հարցերից։

Քաղաքում կգործի գիշերային պարետային ժամ՝ տեղական ժամանակով 23:00-ից մինչև 05:00-ն (շաբաթ և կիրակի օրերի համար)։

Պրեֆեկտի հրամանագրով արգելվում է անհատական պաշտպանության միջոցների, այդ թվում՝ սաղավարտների, դիմակների, լողի կամ դահուկային ակնոցների, պաշտպանիչ ձեռնոցների կրումը, ինչպես նաև վառելիքի տեղափոխումը (տարաներով)։

Բողոքի ակցիաներն արգելվել են նաև մի շարք այլ խոշոր քաղաքներում, այդ թվում՝ Լիոնում և Նիսում։ Փարիզում թույլատրվել է միայն արհմիությունների երթը՝ նախապես համաձայնեցված և հատուկ սահմանված երթուղով։

Այս խիստ միջոցառումները հաջորդում են հոկտեմբերի 17-ին Ֆրանսիայում տեղի ունեցած զանգվածային բողոքի ցույցերին, որոնք ուղղված էին վառելիքի գների աճի և կենսամակարդակի անկման դեմ։ Ըստ կազմակերպիչների տվյալների՝ հավաքներին մասնակցել է շուրջ 800 հազար մարդ։ Մի շարք քաղաքներում ակցիաները վերածվել էին անկարգությունների և ոստիկանության հետ բախումների։ Ներքին գործերի նախարար Լորան Նունյեսը վստահեցրել է, որ իշխանությունները հետևողականորեն քրեական պատասխանատվության են ենթարկելու թալանի և ջարդերի բոլոր մասնակիցներին։