«Զինվորի տան» շահառուները ստանում են հոգեբանական աջակցություն, ձեռք բերում նոր մասնագիտական հմտություններ (ֆոտոշարք)

ՀՀ կրթության, գիտության, մշակույթի և սպորտի նախարար Ժաննա Անդրեասյանն այսօր այցելել է «Զինվորի տուն» վերականգնողական կենտրոն։ ԿԳՄՍ նախարարին ուղեկցել են Երևանի Մխիթար Հերացու անվան պետական բժշկական համալսարանի ռեկտոր Արմեն Մուրադյանը և «Զինվորի տան» տնօրեն Հայկուհի Մինասյանը։

Նախարարը ծանոթացել է կենտրոնում իրականացվող ծրագրերին և շահառուների համար ստեղծված պայմաններին։ Նշվել է, որ ֆիզիկական վերականգնմանը և բուժմանը զուգահեռ «Զինվորի տան» շահառուները ստանում են հոգեբանական աջակցություն, ներգրավվում կրթական, մշակութային և սպորտային ծրագրերում, ձեռք բերում նոր մասնագիտական հմտություններ։

Կենտրոնի ներկայացուցիչները կարևորել են հատկապես շահառուների սոցիալական վերականգնումն ու հասարակական կյանքում լիարժեք ներգրավվածությունը՝ ընդգծելով, որ ֆիզիկական վերականգնումը միայն առաջին փուլն է։ Կյանքի հետագա պլանավորման համար առանցքային նշանակություն ունեն կրթությունը, մասնագիտական զարգացումը, աշխատանք ունենալու հնարավորությունը և սոցիալական ակտիվությունը։

Այցի շրջանակում Ժաննա Անդրեասյանին ներկայացվել է նաև «Զինվորի տան» տարածքում կրթական կենտրոն ստեղծելու նախագիծը, որը նախատեսում է մեկ վայրում համախմբել «Զինվորի տան» շահառուների համար արդեն իսկ իրականացվող կրթական ծրագրերը։

Նշվել է՝ ներկայում շահառուների շրջանում տեղեկություններ են հավաքագրվում՝ պարզելու նրանց կրթական և մասնագիտական հետաքրքրություններն ու կարիքները, մասնավորապես՝ ինչ կրթություն են ցանկանում ստանալ, ինչ մասնագիտություն և հմտություններ են ուզում ձեռք բերել։ Ըստ այդ կարիքների՝ տարբեր կազմակերպությունների հետ համագործակցությամբ կազմակերպվում են դասընթացներ, որոնց մի մասն անցկացվում է տեղում։

Ժաննա Անդրեասյանը կարևորել է նախաձեռնությունը՝ ընդգծելով շահառուների կրթության շարունակականության, նոր մասնագիտական հմտությունների ձեռքբերման և աշխատաշուկայում նրանց լիարժեք ներգրավման համար համապատասխան հնարավորությունների ստեղծման անհրաժեշտությունը։

Նախարարին ներկայացվել են նաև տարբեր տարիներին կենտրոնում բուժում և վերականգնում անցած տղաների հաջողության պատմությունները։ Վերականգնողական բուժումից հետո շատերը նոր մասնագիտություններ և հմտություններ են ձեռք բերել, ներգրավվել մշակութային ու սպորտային ծրագրերում, վերադարձել ակտիվ աշխատանքի։

Կենտրոնի ներկայացուցիչների գնահատմամբ՝ կրթության և կարիերայի բաղադրիչի զարգացումը «Զինվորի տան» գործունեության կարևոր ուղղություններից է։