Սիբիհան շնորհակալություն է հայտնել Բայրամովին Բաքվի տրամադրած հումանիտար օգնության համար

Ադրբեջանի արտգործնախարար Ջեյհուն Բայրամովը պաշտոնական այցով մեկնել է Կիև, Ուկրաինայի արտգործնախարար Անդրիյ Սիբիհայի հետ քննարկել երկկողմ հարաբերությունները, տնտեսական և էներգետիկ ոլորտներում գործակցությունը, միջազգային օրակարգի կարևոր հարցերը, ինչպես նաև Ադրբեջանի ներդրումն Ուկրաինայի վերակառուցման գործում: 

Սիբիհայի խոսքով՝ հանդիպումը հերթական կարևոր քայլն է դարձել Կիևի և Բաքվի միջև ռազմավարական գործընկերության հետագա ամրապնդման համար: Ուկրաինայի արտգործնախարարը շնորհակալություն է հայտնել Բայրամովին՝ պատերազմի առաջին իսկ օրերից Բաքվի տրամադրած հումանիտար օգնության համար, բարձր գնահատել Ադրբեջանի աջակցությունն Ուկրաինայի ինքնիշխանությանն ու տարածքային ամբողջականությանը: 

Նա նաև աջակցություն է հայտնել Ադրբեջանի ինքնիշխանությանն ու տարածքային ամբողջականությանը, և նշել, որ ակնկալում է երկու երկրի միջև ռազմավարական գործընկերության հետագա ամրապնդումը: 

Սիբիհան ցավակցություն հայտնել Սև ծովում ռազմական գործողությունների ընթացքում Ադրբեջանի քաղաքացիների զոհվելու կապակցությամբ:

Բայրամովն էլ նշել է, որ Բաքուն պատրաստ է բնական գազ մատակարարել Ուկրաինային, եթե նման անհրաժեշտություն առաջանա: Ներկայումս SOCAR-ն ակտիվորեն շարունակում է  գործունեությունը Ուկրաինայում, ընկերությունը ապագայի համար մեծ ծրագրեր ունի՝ հավելել է Ադրբեջանի արտգործնախարարը: