Ինչպե՞ս է քաղաքային աղմուկն ազդում մարդու առողջության վրա
Առավոտյան աշխատանքի շտապող մեքենաների ձայները, հասարակական տրանսպորտի աղմուկը, շինարարական աշխատանքները, բարձր երաժշտությունն ու անդադար հնչող ազդանշանները դարձել են քաղաքային կյանքի անբաժան մասը։ Այս ձայներին մարդիկ հաճախ այնքան են սովորում, որ այլևս չեն նկատում դրանք։ Սակայն առաջացած աղմուկը միայն անհարմարություն չէ․ այն կարող է երկարաժամկետ ազդեցություն ունենալ մարդու ֆիզիկական և հոգեկան առողջության վրա։
Աղմուկային աղտոտումը վերջին տարիներին ավելի հաճախ է հայտնվում հանրային առողջության վերաբերյալ քննարկումների կենտրոնում։ Քաղաքների զարգացմանը զուգահեռ աճում են նաև աղմուկի աղբյուրները, իսկ դրանց ազդեցությունը զգացվում է ոչ միայն փողոցներում, այլև բնակարաններում, աշխատավայրերում և կրթական հաստատություններում։
Հոգեբան Անժելա Գալստյանի համոզմամբ՝ մարդու օրգանիզմը մշտապես արձագանքում է արտաքին ձայներին։ Եթե աղմուկը երկարատև է կամ պարբերաբար կրկնվում է, այն կարող է ակտիվացնել սթրեսային մեխանիզմները՝ նույնիսկ այն դեպքում, երբ մարդն այլևս գիտակցաբար ուշադրություն չի դարձնում դրան։
Բժիշկներն այս հարցում իրենց բնորոշումն ունեն․ երկարատև աղմկային միջավայրում գտնվելը կարող է նպաստել գլխացավերի, քնի խանգարումների, նյարդային լարվածության, ուշադրության կենտրոնացման դժվարությունների և աշխատունակության նվազման առաջացմանը։ Բարձր ինտենսիվության աղմուկի երկարատև ազդեցությունը կարող է վնասել նաև լսողությունը։
Հոգեբանի խոսքով՝ մշտական աղմուկը հաճախ ուղեկցվում է դյուրագրգռությամբ, անհանգստության զգացումով ու հուզական լարվածությամբ։ Երբ մարդը չի կարողանում լիարժեք հանգստանալ, օրգանիզմը մշտապես գտնվում է լարված վիճակում, ինչը ժամանակի ընթացքում կարող է անդրադառնալ կյանքի որակի վրա։
Խոշոր քաղաքներում աղմուկի հիմնական աղբյուրները ճանապարհային երթևեկությունն է, շինարարությունը, հասարակական տրանսպորտը, առևտրի և ժամանցի օբյեկտները։ Երևանում հատկապես կենտրոնական փողոցներում օրվա գրեթե բոլոր ժամերին լսվում են մեքենաների ազդանշաններ, շարժիչների ձայներ և տարբեր շինարարական աշխատանքների աղմուկ։
Հատկապես ամռանը խնդիրը ավելի նկատելի է դառնում, բաց պատուհանները, ուշ ժամերին բարձր երաժշտությունը կամ բակերում աղմկոտ հավաքները հաճախ խաթարում են հանգիստը և քունը։
Թեև քաղաքացիների մեծ մասն արդեն սովորել է նման միջավայրին, մասնագետներն ընդգծում են, որ սովորելը չի նշանակում, թե օրգանիզմը դադարել է արձագանքել աղմուկին։
Աղմուկի ազդեցությունը տարբեր մարդկանց վրա նույնը չէ։ Երեխաների դեպքում այն կարող է դժվարացնել ուշադրության կենտրոնացումը և ուսուցման գործընթացը։ Տարեցների մոտ աղմուկը կարող է խորացնել արդեն առկա առողջական խնդիրները։ Առանձնահատուկ ուշադրության կարիք ունեն նաև այն մասնագիտությունների ներկայացուցիչները, որոնք ամեն օր աշխատում են բարձր աղմկային միջավայրում՝ շինարարներ, ճանապարհաշինարարներ ու վարորդներ։
Ինչպե՞ս կարելի է նվազեցնել աղմուկի ազդեցությունը
Մասնագետների կարծիքով՝ խնդրի լուծումը միայն անհատի պատասխանատվությունը չէ։ Քաղաքային իշխանությունների, գործատուների և քաղաքացիների համատեղ քայլերը կարող են նպաստել ավելի առողջ միջավայրի ձևավորմանը։
Նրանք կարևորում են ճանապարհային երթևեկության ավելի արդյունավետ կազմակերպումը, շինարարական աշխատանքների ժամային սահմանափակումների պահպանումը, կանաչ գոտիների ընդլայնումը և աղմուկի վերահսկման մեխանիզմների կիրառումը։ Միաժամանակ քաղաքացիներին խորհուրդ է տրվում հնարավորության դեպքում ժամանակ անցկացնել ավելի հանգիստ միջավայրում, պահպանել քնի ռեժիմը և երկար ժամանակ բարձր ձայների ազդեցության տակ գտնվելու դեպքում օգտագործել լսողությունը պաշտպանող միջոցներ։
Ժամանակակից քաղաքը դժվար է պատկերացնել առանց աղմուկի, սակայն դա չի նշանակում, որ այն պետք է ընդունել որպես անխուսափելի իրականություն։ Քաղաքային աղմուկը վաղուց արդեն միայն կենցաղային անհարմարություն չէ․ այն հանրային առողջության խնդիր է, որի մասին մասնագետներն ավելի հաճախ են բարձրաձայնում։
Քաղաքային միջավայրի զարգացումը պետք է ուղեկցվի ոչ միայն նոր ճանապարհների, շենքերի և ենթակառուցվածքների ստեղծմամբ, այլև բնակիչների կյանքի որակի պահպանմամբ։ Երբ քաղաքի ձայները սկսում են ազդել մարդու առողջության, հանգստի և հոգեբանական բարեկեցության վրա, լռությունը դառնում է ոչ թե շքեղություն, այլ առողջ ապրելակերպի կարևոր պայման։
Top news
Վիճակագրություն․ ի՞նչ փոփոխություններ է կրել ՀՀ ապրանքաշրջանառությունը տարբեր երկրների հետ
Հիտլերի ատրճանակը՝ 42 մլն դոլարով. «Երկրի վրա ամենաթանկարժեք զենքը» հայտնվել է աղմկահարույց դատական ...
4 մլրդ դոլարի ներդրում․ Հրազդանում բացվել է Firebird-ի ԱԲ կենտրոնը
Արարատ Միրզոյանը հեռախոսազրույց է ունեցել Ուկրաինայի ԱԳ նախարարի հետ
Հայաստանում ամառային հանգիստը որքանո՞վ է հասանելի միջին ընտանիքին
Վանաձորի մի շարք հասցեներում գազանջատումներ կլինեն
Աբդոլլահին նշանակվել է Իրանի զինված ուժերի գլխավոր շտաբի պետ
Շիրակի մարզի որոշ հասցեներում գազ չի լինի
«Ուժեղ Հայաստանի» դեմքով Սերժ Սարգսյանը ներկայացված է ԱԺ դահլիճում. Տարոն Չախոյան
Երբ Իրանը գալիս է մեր բանակցողների մոտ, նրանք խոսում են միայն կանխիկի մասին. Ուոլց