Grok AI-ն այլեւս չի կարողանա «մերկացնել» մարդկանց

Grok AI-ի ստեղծողները հայտարարել են, որ այս արհեստական բանականության գործիքն այլեւս չի կարողանա տարբեր երկրների իրական մարդկանց մերկ լուսանկարներ ստեղծել։

«Մենք միջոցներ ենք ձեռնարկել, որպեսզի Grok-ը թույլ չտա իրական մարդկանց պատկերների խմբագրում և նրանց բաց հագուստով, օրինակ՝ բիկինիով, պատկերներ։ Այս սահմանափակումը վերաբերում է բոլոր օգտատերերին, այդ թվում՝ վճարովի բաժանորդներին»,- նշված է X հարթակում  նրանց տեղադրած հայտարարության մեջ։

Փոփոխությունների մասին հայտարարվել է Կալիֆորնիայի գլխավոր դատախազի հայտարարությունից մի քանի ժամ անց։ Դատախազն ասել էր, որ նահանգի իշխանությունները հետաքննում են նման (AI) դիպֆեյքերի տարածումը, այդ թվում՝ երեխաների պատկերներով։

Ավելի վաղ Իլոն Մասկը պաշտպանել էր X-ի արհեստական բանականության այս գործիքը՝ նշելով, որ քննադատները «պարզապես ցանկանում են ճնշել խոսքի ազատությունը»։

Այդ գրառմանը նա կցել էր ԱԲ-ի միջոցով ստեղծված Մեծ Բրիտանիայի վարչապետ Քիր Սթարմերի լուսանկարը՝ բիկինիով։