ԱՄՆ-ն դադարեցնում է Green Card-ի խաղարկության ծրագիրը․ ինչպես դա կազդի Հայաստանից դիմողների վրա

ԱՄՆ-ը դադարեցնում է Green Card-ի խաղարկության ծրագիրը Ռոդ Այլենդ նահանգի Բրաունի համալսարանում տեղի ունեցած հրաձգությունից հետո, քանի որ կրակողը երկիր էր մուտք գործել Diversity Lottery (DV1) ծրագրով՝ ստանալով Green Card, հայտարարել է ԱՄՆ ներքին անվտանգության նախարար Քրիստի Նոեմը։ «Նախագահ Թրամփի հանձնարարությամբ ես անհապաղ հանձնարարեցի USCIS-ին դադարեցնել DV1 ծրագիրը, որպեսզի երաշխավորվի, որ այլևս ոչ մի ամերիկացի չի տուժի այս աղետալի ծրագրից»,- գրել է Նոեմը։

Կրակոցներ, որոնք ոչ միայն հանցագործություն էին, այլև դարձան ողջ երկրի քաղաքականության վերանայման պատճառ։ Ռոդ Այլենդ նահանգի Բրաունի համալսարանում հրաձգության հեղինակը՝ Կլաուդիո Մանուել Նևեշ Վալենտեն, ԱՄՆ է մուտք գործել 2017 թվականին՝ Green Card-ով։

ԱՄՆ ներքին անվտանգության նախարար Քրիստի Նոեմը հենց սա է մատնանշել որպես Green Card-ի խաղարկության ծրագիրը դադարեցնելու պատճառ։  Նոեմը հիշեցրել է, որ Թրամփը դեռ իր առաջին նախագահական ժամկետի ընթացքում պայքարում էր՝ դադարեցնելու այս ծրագիրը այն բանից հետո, երբ Նյու Յորքում «Իսլամական պետություն» ահաբեկչական կազմակերպության անդամի վարած բեռնատարը   մխրճվել էր մարդկանց բազմության մեջ։ Զոհվել էր ութ մարդ։ Այդ բեռնատարի վարորդը նույնպես երկիր էր մուտք գործել DV1 ծրագրով։

Եւ այսպես, ԱՄՆ-ը դադարեցնում է Green Card-ի խաղարկության ծրագիրը։ Որոշման մասին հայտարարել է ԱՄՆ ներքին անվտանգության նախարար Քրիստի Նոեմը։

«Նախագահ Դոնալդ Թրամփի հանձնարարությամբ ես անմիջապես հանձնարարել եմ ԱՄՆ քաղաքացիության և ներգաղթի ծառայությանը դադարեցնել DV1 ծրագիրը, որպեսզի երաշխավորվի, որ այլևս ոչ մի ամերիկացի չի տուժի այս աղետալի ծրագրից»,– հայտարարել է Նոեմը։

Ինչ է Diversity Visa ծրագիրը։ գործում է ԱՄՆ ներգաղթի մասին օրենքի շրջանակում ավելի քան երեք տասնամյակ։ Նախատեսված է ԱՄՆ ներգաղթի համակարգում աշխարհագրական բազմազանություն ապահովելու համար և հնարավորություն է տալիս այն երկրների քաղաքացիներին, որոնցից ԱՄՆ ներգաղթը համեմատաբար ցածր է, մասնակցել վիճակախաղի։

Ամեն տարի ծրագրի միջոցով տրամադրվում է  50–55 հազար մշտական բնակության վիզա։ Մասնակիցները նախ ընտրվում են պատահական վիճակահանությամբ, ապա անցնում են բազմաստիճան ստուգումներ՝  հարցազրույց, բուժզննում և անվտանգային  ստուգումներ։ Ծրագրում   նաև սահմանափակում կա․ որևէ երկիր չի կարող ստանալ ընդհանուր վիզաների ավելի քան 7 տոկոսը։

Diversity Visa ծրագիրը տարիներ շարունակ եղել է քաղաքական քննադատության թիրախ, քանի որ երկիր մուտք գործած միգրանտների կողմից հանցագործությունները զգալի թիվ են կազմում։

Այս անգամ վիզայի դադարեցման կտրուկ որոշումն ընդունվել է  հերթական հանցագործությունից հետո՝ իշխանությունների պնդմամբ՝ անվտանգության ռիսկերը նվազեցնելու նպատակով։

Ինչ է սպասվում․ Reuters-ի փոխանցմամբ՝ խոսքը ներկայում ծրագրի ժամանակավոր դադարեցման  մասին է։ Դրա ամբողջական չեղարկման համար անհրաժեշտ է Կոնգրեսի միջամտությունը, քանի որ ծրագիրն ամրագրված է օրենքով։

Մինչև այդ՝ ԱՄՆ ներգաղթի ծառայություններին հանձնարարված է կասեցնել Diversity Visa ծրագրի ընթացիկ գործընթացները՝ մինչև հետագա քաղաքական որոշումները։

Ծրագրի դադարեցումը կարող է լրջորեն ազդել տասնյակ հազարավոր դիմողների վրա ամբողջ աշխարհում, այդ թվում՝ Հայաստանի քաղաքացիների, որոնց համար Green Card-ի խաղարկությունը տարիներ շարունակ եղել է ԱՄՆ տեղափոխվելու հիմնական օրինական ուղիներից մեկը։