Վերահաշվարկից հետո Վաղարշապատի ՏԻՄ ընտրությունների արդյունքները մնացել են նույնը

Վաղարշապատ համայնքի թիվ 14 ընտրատեղամասային ընտրական հանձնաժողովը «Հանրապետություն» կուսակցության վստահված անձանց բողոքի հիման վրա երեկ և այսօր վերահաշվարկել է Էջմիածին քաղաքի 3 ընտրատեղամասի արդյունքները, իսկ 3 ընտրատեղամաս էլ հանձնաժողովն է վիճակահանությամբ հաշվարկել, որից մեկը համընկել է բողոք ներկայացված թիվ 14/22 ընտրատեղամասի հետ: 5 ընտրական տեղամասի քվեարկության արդյունքները վերահաշվարկելուց հետո կողմ ձայների փոփոխություն չի գրանցվել, փոխվել  է անվավեր ճանաչված քվեաթերթիկների թիվը՝ չսահմանված նմուշի դատարկ ծրարներն արձանագրվել էին անվավեր քվեաթերթ:

Վաղարշապատի ավագանու արտահերթ ընտրություններից հետո թիվ 14 ԸԸՀ-ը վերահաշվարկի դիմում-բողոք էր ստացել «Հանրապետություն» կուսակցության վստահված անձանցից: Նրանք անհամաձայնություն էին հայտնել քվեարկության արդյունքների վերաբերյալ և պահանջել վերահաշվարկել Էջմիածին քաղաքի թիվ 14/15,  14/16 և 14/22 ընտրատեղամասերի ընտրական քվեաթերթերը: Թիվ 14 ընտրատատարածքային հանձնաժողովը նոյեմբերի 18-ին ժամը 14-00-ից սկսել է նշված ընտրական տեղամասերի քվեարկության արդյունքների վերահաշվարկը՝ «Ռադիոլուրին» ասում է ընտրատարածքային հանձնաժողովի նախագահ Գրիգոր Նազարյանը:

«Երեք ընտրատեղամասի վստահված անձինք վերահաշվարկի դիմում էին ներկայացրել, երեք տեղամաս էլ մենք վիճակահանությամբ ենք որոշել հաշվարկել՝ ըստ ընտրական օրենսգրքի պահանջների, որից մեկը համընկավ իրենց ներկայացրած թիվ 14/22 ընտրատեղամասի հետ: Հինգ ընտրական տեղամասի քվեարկության արդյունքները վերահաշվարկել ենք, կողմ ձայների որևէ տվյալ չի փոխվել»:

Թիվ 14/15 ընտրական տեղամասը Էջմիածնի «Ձնծաղիկ» մանկապարտեզում է, թիվ14/16-ը՝ մանկապատանեկան մարզադպրոցի շենքում, իսկ թիվ 14/22 ընտրատեղամասը՝ «Գարուն» մանկապարտեզի շենքում: Այս ընտրատեղամասերում ավագանու թեկնածու կուսակցություների կողմ քվեների փոփոխություն չի եղել, սակայն փոխվել է անվավեր քվեաթերթերի թիվը. դատարկ ծրարները արձանագրել էին որպես անվավեր: Այդպիսով, ընտրությունների արդյունքում 132 անվավեր քվեաթերթերը դարձել են 124: Թիվ 14/15 ընտրատեղամասում «Հանրապետություն»  կուսակցությունը ստացել էր 44 քվե, 14/16 ընտրատեղամասում՝ 34 քվե, իսկ 14/22-ում՝ 45 կողմ քվե: «Հանրապետություն» կուսակցության ընտրական ցուցակում ընդգրկված էր ավագանու անդամի 22 թեկնածու, որի առաջին համարը Հարություն Մկրտչյանն էր:

Վաղարշապատի ՏԻՄ ընտրությունների արդյունքում «Հանրապետություն» կուսակցությունը ստացել էր 1241 ձայն. կողմ է քվեարկել ընտրությանը մասնակցած ընտրողների ընդհանուր թվի 3.9 տոկոսը: Կուսակցությունների համար անցողիկ շեմը 4 տոկոսն է, դաշինքի համար՝ 6 տոկոսը: «Հանրապետություն» կուսակցության քաղաքական խորհուրդը, «Ֆեյսբուք» սոցիալական հարթակում շնորհավորելով «Քաղաքացիական պայմանագիր» կուսակցությանը հաղթանակի առիթով, նաև ափսոսանք է հայտնել ՏԻՄ ընտրություններում անցողիկ շեմը չհաղթահարելու համար և նշել.

«Մենք շատ կարևոր ենք համարում Գյումրիի տարբերակի մերժումը և կարծում ենք, որ մեր ներդրումն ենք ունեցել այդ խնդրում: Ցավոք, մեր թիմին մի քանի ձայն չհերիքեց անցողիկ շեմը հաղթահարելու համար, որից մենք հետևություն կանենք և այսօրվանից էլ նույն ներուժով կպատրաստվենք 2026-ի խորհրդարանական ընտրություններին»:

Կուսակցության քաղխորհուրդը երախտագիտություն է հայտնել ընտրողներին՝ վստահության քվե տալու համար: «Ընտրական օրենսգրքի» համաձայն՝ ընտրություններից 7 օր հետո  թիվ 14 ԸԸՀ-ն գրանցելու է Վաղարշապատ համայնքի ավագանու թեկնածուներին՝ ասում է հանձնաժողովի նախագահ Գրիգոր Նազարյանը:

«Մենք ընտրությունների ամփոփման նիստն անելու ենք նոյեմբերի 23-ին՝ ընտրությունների 7-րդ օրը, իսկ թեկնածուներին մանդատները կտրամադրվեն  դեկտեմբերի 1-ին: Իսկ եթե թեկնածուները դիմեն դատարան, ապա այս գործընթացը կհետաձգվի մեկ շաբաթով»:

Վաղարշապատի ՏԻՄ արտահերթ ընտրություններին ընտրելու իրավունք ունեցող շուրջ 70 հազար ընտրողից մասնակցել էր 31.5 հազարը կամ ընտրողների ընդհանուր թվի 45.1 տոկոսը: Անցողիկ շեմը հաղթահարել է 3 քաղաքական ուժ և ավագանիում «Քաղաքացիական պայմանագիր» կուսակցությունը հանդես է գալու 19 անդամով՝ համայնքի ղեկավարի թեկնածուն Արգիշտի Մեխակյանն է, «Հաղթանակ» դաշինքը՝ 12 անդամով և «Մայր Հայաստան» կուսակցությունը՝ 2 անդամով: