ԱՄՆ-ը կարող է նոր պատժամիջոցներ սահմանել Ռուսաստանի դեմ

Հնարավոր է, որ առաջիկայում Միացյալ Նահանգները նոր պատժամիջոցներ սահմանի Ռուսաստանի դեմ։ Այս մասին, հղում անելով Ռուսաստանի արտգործնախարության իրենց աղբյուրին, երեկ գրել է Gazeta.ru օնլայն պարբերականը։

Այս անգամ պատժամիոջների թիրախ կդառնան Ռուսաստանի բանկային սեկտորը, մասնավորապես «Банк России», «Газпромбанк», «Россельхозбанк» բանկերը: Այս խոշորագույն բանկերի դեմ պատժամիջոցները չեն կարող չանդրադառնալ Ռուսաստանի ողջ ֆինանսաբանկային համակարգի վրա։

Ընդ որում, Gazeta.ru-ն գրում է, որ Միացյալ Նահանգները այս նոր պատժամիջոցներին միանալու հայտ է ներկայացրել նաև Եվրամիությանը: Մինչ այժմ Եվրամիությունը զգուշությամբ էր վերաբերվում ամերիկյան այն պատժամիջոցներին, որ հակասում էին Եվրոպայի շահերին։

Երեկ պատժամիջոցների մասին խոսել է նաև Ռուսաստանում Միացյալ Նահանգների դեսպան Ջոն Թեֆթը:

«Բարաք Օբամայի ադմինիստրացիան ընտրության առջև էր կանգնած. ուզո՞ւմ ենք մենք պատերազմ սկսել Ռուսաստանի դեմ, թե ոչ: Ոչ ոք չէր ուզում: Ինչպես ես եմ հասկանում, պատերազմ չէր ուզում նաև Ռուսաստանը: Եվ քանի որ Ռուսաստանը Ուկրաինայի հետ կապված խախտել էր միջազգային նորմերը, Միացյալ Նահանգները պետք է իր անհամաձայնությունը արտահայտեր: Եվ հենց այդ պատճառով էլ սահմանվել էին այդ պատժամիջոցները», - պարզաբանել է դեսպանը: - «Իսկ նոր պատժամիջոցները, որ Սենատը վերջերս էր ընդունել, արդեն ԱՄՆ ընտրական գործընթացին Մոսկվայի միջամտության փորձին ի պատասխան էր», - Эхо Москвы ռադիոկայանի եթերում երեկ ասել է Ռուսաստանում ԱՄՆ դեսպան Ջոն Թեֆթը, ով սեպտեմբերին արդեն վերադառնում է Վաշինգտոն: