Պեսկովը կորոնավիրուսից բուժման ընթացքում մորուք է աճեցրել և նիհարել է (տեսանյութ)
ՌԴ նախագահի մամլո քարտուղար Դմիտրի Պեսկովը կորոնավիրուսից բուժման ընթացքում մորուք է աճեցրել և նիհարել է: ТАСС գործակալության փոխանցմամբ՝ այս մասին նա ինքն է հայտնել «Մոսկվա. Կրեմլ. Պուտին» հաղորդման շրջանակներում:
«Երբ հիվանդացա, որոշեցի, որ մորուք եմ աճեցնելու, քանի դեռ հնարավոր չի լինի ազդարարել ամբողջական հաղթանակ կորոնավիրուսի դեմ՝ դե ֆակտո և դե յուրե»,- ասել է Պեսկովը հաղորդավար Պավել Զարուբինի ինստագրամյան էջում հրապարակված տեսանյութում:
Պեսկովը հաստատել է նաև, որ հիվանդության ընթացքում նիհարել է: «Տվյալ դեպքում մորուքը փոքր-ինչ փոխհատուցում է»,- կատակել է ՌԴ նախագահի խոսնակը:
Վերջինս հավելել է, որ մորուքը ժամանակավոր է և այն կսափրի գրասենյակ՝ աշխատանքի վերադառնալուն պես:
Հիշեցնենք, որ Պեսկովի և նրա կնոջ՝ գեղասահքի օլիմպիական չեմպիոնուհի Տատյանա Նավկայի՝ կորոնավիրուսով հոսպիտալացման մասին հայտնի էր դարձել մայիսի 12-ին: