Ինչու ՞ են հնդկաձավարն ու ոսպը թանկացել. պարզաբանում է նախարարը
Հնդկաձավարի եւ ոսպի գների բարձրացումը կապված է լոգիստիկ շղթայի խաթարման հետ: Այս մասին ապրիլի 3-ին լրագրողների հետ հանդիպման ժամանակ ասաց ՀՀ էկոնոմիկայի նախարար Տիգրան Խաչատրյանը:
Ըստ նրա` Իրանից եւ Ռուսաստանից բեռների հոսքերն այդ պատճառով որոշ դժվարությունների են բախվում, ինչը, սակայն, չի խանգարում հայ արտահանողներին անխափան մատակարարում ապահովել:
«Բացի այդ, Ռուսաստանում հնդկաձավարի գինը սկսել էր բարձրանալ դեռ նախքան կորոնավիրուսի բռնկման հետեւանքով առաջացած ճգնաժամը: Պատճառները կապված են շուկայի հետ: Մեկ տարվա ընթացքում Ռուսաստանում հնդկաձավարի գինը բարձրացել է 2 անգամ»,- ասաց նա:
Նախարարը հավելեց, որ եթե ներքին շուկայում խնդիրներ առաջանան, ապա դրան կարձագանքի Տնտեսական մրցակցության պաշտպանության պետական հանձնաժողովը: